Prishtinë, 12 nëntor, Zhurnal.mk – KRU “Hidrodrini” dhe Komuna e Istogut kanë nënshkruar Memorandum Bashkëpunimi për realizimin e projekteve infrastrukturore që synojnë përmirësimin e furnizimit me ujë të pijshëm në këtë komunë.
Lajmin e ka bërë të ditur KRU “Hidrodrini”, duke njoftuar se memorandumi është nënshkruar nga kryeshefi ekzekutiv i kompanisë, Dri Cena, dhe kryetari i Komunës së Istogut, Ilir Ferati.
Sipas njoftimit, ndërhyrjet e para do të përfshijnë fshatrat Cërkolez, Kërrninë e Epërme, Padalishtë, Suriganë, si dhe bajpasin Rakosh–Kërrninë.
Ndërkaq, gjatë vitit 2027 parashihet funksionalizimi i ujësjellësit për fshatrat Syne dhe Mojstir, ndërtimi i një kaptazheje shtesë në bjeshkët e Istogut, si dhe ndërhyrje për mbrojtjen e burimeve dhe rehabilitimin e infrastrukturës së ujit në komunë.
Këto projekte synojnë përmirësimin e furnizimit me ujë të pijshëm dhe avancimin e shërbimeve për banorët e Istogut.
Memorandumi përcakton bashkëpunimin ndërmjet dy institucioneve për realizimin e investimeve gjatë periudhës 2026–2027.
