Një veturë historike Porsche 924, e cila në vitin 1979 ishte pjesë e flotës së Policisë së Emirateve të Bashkuara Arabe dhe përdorej për eskortimin e Mbretëreshës Elizabeth II gjatë vizitës së saj të parë zyrtare në këtë vend, është restauruar dhe rikthyer në pamjen e saj origjinale.
Porsche 924 ishte vetura e parë sportive që iu bashkua flotës federale të policisë në Emiratet e Bashkuara Arabe.
Ajo u përdor për të shoqëruar Mbretëreshën Elizabeth II dhe bashkëshortin e saj, Princin Philip, gjatë vizitës në rajonin e Gjirit, vetëm shtatë vjet pas shpalljes së pavarësisë së Emirateve.
Gjatë dekadave, vetura ka kaluar nëpër disa ndryshime estetike dhe është parë me ngjyra të ndryshme.
Megjithatë, gjatë restaurimit të fundit, u vendos që ajo të rikthehej në ngjyrat dhe dizajnin origjinal të policisë, ashtu siç dukej pothuajse 50 vjet më parë.
Restaurimi u realizua nga Porsche Centre Abu Dhabi dhe Al Ain.
Përveç rinovimit të plotë të veturës, specialistët rikrijuan edhe mbishkrimet policore të pikturuara me dorë, duke ruajtur stilin origjinal dhe duke shmangur përdorimin e ngjitëseve moderne.
Vetura iu dorëzua Policisë së Abu Dhabit gjatë një ceremonie të organizuar në Muzeun Al Maqta.
Ajo do të ekspozohet për publikun në festivalin “Icons of Porsche”, i cili do të mbahet në Dubai më 21 dhe 22 nëntor.
