QSUNT hap sallën e tetë të Kirurgjisë së Përgjithshme dhe Digjestive, kapacitet për 7 ndërhyrje në ditë

Nga D V
A+ A-
Rivendos

Tiranë, 17 nëntor, Zhurnal.mk – Qendra Spitalore Universitare “Nënë Tereza” ka shtuar kapacitetet për ndërhyrjet kirurgjikale me hapjen e sallës së tetë të Kirurgjisë së Përgjithshme dhe Digjestive, e dedikuar për kirurgjinë ditore, ku pacientët kanë nevojë për hospitalizim deri në 24 orë.

Ministrja e Shëndetësisë dhe Mirëqenies Sociale, Klodiana Spahiu, bëri të ditur se salla e re është pajisur me aparatura moderne dhe do të mundësojë kryerjen e ndërhyrjeve të specialiteteve të ndryshme, përfshirë urologjinë dhe kirurgjinë e përgjithshme.

Ndërsa, Dr. Shk. Enton Bollano, kirurg në QSUNT shprehet se pas operacionit, pacientët do të qëndrojnë në pavijonin e kirurgjisë ditore, i vendosur në katin e dytë të strukturës.

“Në këtë sallë bëhen operacione të cilat qëndrojnë në spital minimalisht dhe maksimalisht 24 orë. Janë operacione të gamave të ndryshme, duke filluar që nga urologjia, kirurgjia e përgjithshme. Sipër në kat të dytë është pavioni i kirurgjisë ditore, ku pacientët pasi operohen shtrohen atje. Kjo sallë është investim goxha i vlefshëm dhe shumë i dobishëm për pacientët pasi ul kohëzgjatjen e pritjes së pacientëve për t’u operuar. Këtu llogaritet, domethënë, të bëhen gjashtë deri në 7 operacione në ditë”, tha Bollano.

Hapja e kësaj salle, synon të shkurtojë kohën e pritjes për ndërhyrje kirurgjikale, të rrisë mundësitë e trajtimit të pacientëve dhe të përmirësojë shfrytëzimin e kapaciteteve spitalore, duke lehtësuar njëkohësisht fluksin në repartet e kirurgjisë.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër