Katër shenja të menopauzës mashkullore që burrat shpesh i ngatërrojnë me plakjen

Nga D V
A+ A-
Rivendos

Andropauza, e njohur ndryshe si menopauza mashkullore, është një proces që mund të prekë disa burra gjatë të dyzetave dhe të pesëdhjetave.

Ajo lidhet me rënien graduale të nivelit të testosteronit dhe mund të shfaqet përmes ndryshimeve në humor, dëshirës seksuale dhe gjendjes fizike.

Megjithatë, ka disa shenja më pak të njohura që burrat shpesh ia atribuojnë plakjes normale. Profesori Tet Yap, kirurg andrologjik dhe profesor i urologjisë, ka veçuar katër prej tyre për Metro.

1. Dobësimi i kockave

Testosteroni ndihmon në ruajtjen e dendësisë së kockave. Kur niveli i tij mbetet për një kohë të gjatë shumë i ulët, mund të rritet rreziku i osteoporozës, një gjendje që i bën kockat më të dobëta dhe më të brishta.

Kjo humbje mund të ndodhë pa shenja të dukshme paralajmëruese, derisa të shfaqet një frakturë. Sipas Yap, osteoporoza nuk është problem vetëm i grave, pasi mund të prekë edhe burrat.

2. Afshet e nxehta dhe djersitjet gjatë natës

Edhe pse lidhen kryesisht me menopauzën tek gratë, afshet e nxehta mund të shfaqen edhe tek burrat me rënie të ndjeshme të testosteronit.

Kjo mund të shoqërohet me djersitje gjatë natës dhe ndjesi të papritura të nxehtësisë. Megjithatë, këto simptoma mund të kenë edhe shkaqe të tjera, si infeksionet, problemet me tiroiden, alkooli apo përdorimi i disa ilaçeve.

3. Ndryshimet në ejakulim

Përveç uljes së dëshirës seksuale dhe problemeve me ereksionin, testosteroni i ulët mund të shoqërohet edhe me vonesë të ejakulimit dhe zvogëlim të vëllimit të tij.

Sipas specialistit, shumë burra nuk flasin për këto ndryshime, duke i konsideruar pjesë të natyrshme të plakjes. Megjithatë, kombinimi i dëshirës së ulët seksuale, mungesës së ereksioneve në mëngjes dhe vështirësive me ereksionin mund të jetë një tregues më domethënës i mungesës së testosteronit.

4. Ndryshimet në pamjen fizike

Rënia e testosteronit mund të ndikojë edhe në pamjen e jashtme. Shenjat përfshijnë zvogëlimin e masës muskulore, hollimin e flokëve, zvogëlimin e testikujve dhe zmadhimin e indit të gjirit, i njohur si gjinekomasti.

Yap këshillon që këto ndryshime të diskutohen me mjekun, veçanërisht kur shoqërohen me probleme seksuale ose shqetësime të tjera shëndetësore.

Specialisti thekson se lodhja, gjumi i dobët, shtimi në peshë dhe humori i ulët nuk lidhen domosdoshmërisht me testosteronin e ulët. Ato mund të shkaktohen edhe nga stresi, depresioni, diabeti, sëmundjet e zemrës apo përdorimi i disa medikamenteve.

Për këtë arsye, diagnoza duhet të mbështetet në vlerësimin mjekësor dhe analizat hormonale, jo vetëm në praninë e disa simptomave.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër