Bruksel, 20 shtator Zhurnal.mk – NATO është e gatshme të përgjigjet ndaj një përshkallëzimi të mundshëm rus në krahun lindor të Evropës, deklaroi të shtunën admirali Giuseppe Cavo Dragone, gjenerali më i lartë i Aleancës, në një kohë kur po shtohen paralajmërimet për një sulm të mundshëm të inskenuar nga Moska.
“Alianca është gati, struktura është gati, ushtarët… armët janë gati”, deklaroi Dragone para gazetarëve gjatë takimit të rregullt të 32 gjeneralëve më të lartë të Aleancës në Kopenhagë. Ai shtoi se NATO po vazhdon punën për rritjen e këtyre forcave, si në numër, ashtu edhe në aspektin e sofistikimit të kapaciteteve të tyre.
Deklaratat vijnë pas paralajmërimeve në rritje nga liderët evropianë për një përshkallëzim të mundshëm rus në Evropë. Të enjten, kryeministri polak Donald Tusk deklaroi se Moska mund të dërgojë dronë ose raketa drejt një vendi anëtar të NATO-s në vijën e parë të frontit “në muajt e ardhshëm”, në kuadër të një provokimi të inskenuar për të testuar Aleancën. Ky rrezik u përmend më pas edhe nga Franca dhe Holanda.
Evropa është përballur javët e fundit me një numër në rritje të shkeljeve të hapësirës ajrore dhe përpjekjeve për sabotim, ndërsa tensionet me Rusinë vazhdojnë të rriten për shkak të luftës së saj në shkallë të gjerë në Ukrainë. Në gusht, raporte të inteligjencës amerikane paralajmëruan se Moska mund të jetë duke planifikuar një sulm të kufizuar ndaj një vendi të NATO-s në vitet e ardhshme.
Dragone, i cili drejton Komitetin Ushtarak të NATO-s, tha se gjeneralët e Aleancës nuk i diskutuan të shtunën paralajmërimet e fundit, por theksoi se NATO ka “4,000 faqe” plane ushtarake të gatshme për mbrojtjen e krahut lindor, duke nisur nga skenarët që përfshijnë një “krizë minimale ose ndërhyrje në territorin tonë”.
Aleatët e NATO-s miratuan në vitin 2023 tre plane rajonale operacionale të mbrojtjes, pas pushtimit në shkallë të gjerë të Ukrainës nga Rusia.
“Jemi gati në rast të një përshkallëzimi”, tha Dragone. “Në rast të një sulmi, ne e dimë se çfarë duhet të bëjmë.”
“Sjellja e pamatur e Rusisë gjatë javëve dhe muajve të fundit… vazhdon të vërë në provë vendosmërinë e aleatëve” dhe “synon të minojë besimin dhe të dobësojë unitetin tonë”, tha Dragone, duke shtuar:
“Dua të jem i qartë – këto përpjekje nuk po na ndajnë. Përkundrazi, po i mprehin mjetet tona, duke na bërë shumë më të bashkuar dhe më të vendosur.”
