Tetovë, 5 korrik, Zhurnal.mk – Dega e Bashkimi Demokratik për Integrim në Tetovë ka njoftuar se më 11 korrik do të organizojë një protestë qytetare, pas vendimit të Gjykatës Kushtetuese për shfuqizimin e vendimit për emërtimin e rrugëve dhe sheshit në Tetovë.
Në një kumtesë për opinionin, BDI pretendon se komuna e Tetovës nuk e ka dorëzuar dokumentacionin e kërkuar nga Gjykata Kushtetuese, gjë që, sipas partisë, ka ndikuar në shfuqizimin e vendimit dhe rikthimin e emrave të mëparshëm të rrugëve.
“Prandaj, për ne është më se e qartë se Bilall Kasami mban përgjegjësi të drejtpërdrejtë politike për këtë vendim skandaloz. Heshtja dhe mosveprimi i tij ndaj kërkesave të Gjykatës Kushtetuese përbëjnë përgjegjësi të rëndë ndaj interesit, historisë dhe dinjitetit të qytetarëve të Tetovës”, thuhet në reagimin e BDI-së.
Nga dega e BDI-së në Tetovë vlerësojnë se vendimi për emrat e rrugëve prek identitetin dhe trashëgiminë e qytetit, ndërsa i bëjnë thirrje qytetarëve të marrin pjesë në protestën e paralajmëruar.
“Ftojmë të gjithë qytetarët të na bashkohen në protestën e 11 korrikut, në mbrojtje të dinjitetit, historisë dhe identitetit të Tetovës”, theksohet në kumtesë.
Protesta vjen pas vendimit të Gjykatës Kushtetuese që shfuqizoi aktin për emërtimin e një pjese të rrugëve dhe sheshit në Tetovë.
