Kumanovë, 8 tetor, Zhurnal.mk – Pas bllokimit të deponisë “Krasta” nga banorët e fshatrave Pçinjë dhe Studena Barë, NP “Pastërtia dhe Gjelbërimi” është detyruar të kërkojë alternativa për deponimin e mbeturinave të grumbulluara në Kumanovë.
Për shkak të bllokadës, mbeturinat e qytetit po transportohen në deponitë e Kratovës dhe Rankovcës. Deri tani janë transportuar rreth 45 tonë mbeturina, kryesisht të grumbulluara nga zona urbane e Kumanovës.
Drejtori i ndërmarrjes, Sasho Tomiq, tha se po bëhen përpjekje që qytetarët të mos përballen me pasojat e situatës së krijuar.
“Po përpiqemi që qytetarët të mos e ndiejnë problemin. Falë mirëkuptimit të komunave fqinje, po vazhdojmë me transportimin e mbeturinave”, deklaroi Tomiq.
Ndërmarrja publike po punon për gjetjen e zgjidhjeve alternative për menaxhimin e mbeturinave, ndërsa situata mbetet e varur nga tejkalimi i bllokadës në deponinë “Krasta”.
Nga NP “Pastërtia dhe Gjelbërimi” u kanë bërë thirrje qytetarëve për mirëkuptim dhe durim deri në gjetjen e një zgjidhjeje përfundimtare për problemin.
