Shkup, 2 Prill, Zhurnal.mk – Dëshmitarët thanë në procesin gjyqësor se Ministria e Brendshme dhe Qendra për Çështje Sociale ishin në dijeni për dhunën që bëhej nga Stojançe Jovanoski ndaj viktimave.
Paralajmërimet, sipas dëshmitarëve të thirrur në seancë, i kishin bërë anëtarë të familjes si dhe fqinjët.
Në seancën e sotme në Gjykatën Penale të Shkupit kundër Stojançe Jovanovskit, dëshmitarët paraqitën detaje rreth dhunës në familje që kanë pësuar viktima Ivana Jovanovska dhe vajza e saj Katja, lajmërojnë media maqedonase nga gjykimi.
Mësuesja e Katjas nga “Johann Heinrich Pestalozzi” dëshmoi se shkolla u informua nga gjyshja e vajzës për dhunën në familje nga babai, gjë që iu raportua edhe psikologut të shkollës dhe u monitorua sjellja e fëmijës. Ditën e tragjedisë, në vend të gjyshes, erdhi Ivana për të marrë fëmijën.
Fqinjët thanë se grindjet dhe të bërtiturat dëgjoheshin nga apartamenti për një kohë të gjatë, dhe një fqinje tha se e kishte raportuar në polici, por në vend të një reagimi, kishte marrë një kërcënim për kallëzim të rremë. Fëmija, sipas deklaratave, po trokiste në dyer duke kërkuar ndihmë.
Në sallën e gjyqit u theksua se si Ministria e Brendshme ashtu edhe Qendra për Çështje Sociale ishin në dijeni të rastit, por nuk iu përgjigjën thirrjeve të nënës për ndihmë.
Vëllai i Ivanës, Aleksandar Stojanovski, dëshmoi gjithashtu, duke sqaruar të gjitha dilemat rreth trashëgimisë pas vdekjes së babait të tyre.
Dje, Martin Sazdov dëshmoi për momentet e fundit të jetës së Ivanës dhe Katjas, duke thënë se ai dhe Stojançe ishin ulur përpara ndërtesës kur Ivana telefonoi me kamerën e ndezur pak momente para kërcimit të saj fatal drejt vdekjes.
