Tiranë, 12 gusht, Zhurnal.mk – Ministri për Evropën dhe Punët e Jashtme, Ferit Hoxha vlerësoi sot rolin e të rinjve në zhvillimin e Shqipërisë dhe procesin e integrimit evropian, në kuadër të Ditës Ndërkombëtare të Rinisë.
Përmes një reagimi në rrjetet sociale, Hoxha theksoi se talenti, kreativiteti, energjia dhe vendosmëria e të rinjve janë të domosdoshme për ndërtimin e një Shqipërie më të fortë, më të begatë dhe gjithnjë e më evropiane.
Sipas tij, të rinjtë nuk janë thjesht përfitues të progresit, por kontribuues aktivë dhe bashkëkrijues të një shoqërie më demokratike, dinamike dhe të orientuar drejt së ardhmes.
Hoxha kujtoi takimet e zhvilluara me nxënës dhe studentë në qytete të ndryshme të vendit që prej fillimit të mandatit të tij, duke i cilësuar ato si mundësi për dialog të hapur mbi aspiratat, ambiciet dhe shqetësimet e brezit të ri.
Në këtë kuadër, ai veçoi nismën “EU and You – Europe Starts at Home”, përmes së cilës, sipas tij, janë shkëmbyer ide, perspektiva dhe përvoja me të rinjtë në një kohë kur Shqipëria po avancon drejt objektivit strategjik të anëtarësimit në Bashkimin Evropian.
Ministri bëri të ditur se kjo nismë do të vijojë pas pushimeve të verës, duke u shtrirë në qytete të tjera dhe duke krijuar mundësi të reja për angazhim dhe dialog me të rinjtë në të gjithë vendin.
Hoxha vuri në dukje gjithashtu rëndësinë e brezit të ri në Shërbimin e Jashtëm shqiptar.
Ai tha se këtë vit është ndërmarrë një proces i ri rekrutimi mbi bazën e meritës, me synim tërheqjen e profesionistëve më të mirë dhe investimin në kompetencë, profesionalizëm dhe ekselencë.
Sipas Hoxhës, afrimi i Shqipërisë me Bashkimin Evropian e bën edhe më të rëndësishëm rolin e të rinjve, pasi procesi i integrimit nuk lidhet vetëm me institucionet, legjislacionin dhe negociatat, por edhe me përgatitjen e një brezi të ri që do të udhëheqë, inovojë dhe mbrojë vlerat mbi të cilat do të ndërtohet e ardhmja evropiane e vendit.
“Evropa nuk është thjesht destinacioni që synojmë të arrijmë. Mbi të gjitha, është standardi që duhet të ndërtojmë në shtëpi, çdo ditë, përmes institucioneve, shoqërisë dhe njerëzve tanë”, u shpreh Hoxha.
Ai theksoi se zëri, talenti dhe vendosmëria e të rinjve kanë rëndësi për të ardhmen e vendit.
“E ardhmja e tyre është e ardhmja e Shqipërisë. E ardhmja e tyre është e ardhmja e Evropës”, përfundoi ministri Hoxha.
