Shkup, 19 gusht, Zhurnal.mk – Në shkollën fillore “Aleksandar Makedonski” në Qendrën Rajonale të komunës Aerodrom po ndërtohen tre klasa të reja me qëllim sigurimin e mësimit njëturnësh për të gjithë nxënësit.
Investimi mbështetet nga Ministria e Arsimit dhe Shkencës me vlerë prej 2,2 milionë denarësh, ndërsa punimet ndërtimore pritet të përfundojnë për tre muaj.
Sot inspektim në terren kryen ministrja e Arsimit dhe Shkencës, prof. dr. Vesna Janeska, dhe kryetari i komunës Aerodrom, Dejan Miteski.
Ministrja Janeska theksoi përfitimet e këtij koncepti të mësimit, duke përmendur se deri më tani e kanë pranuar mbi 200 shkolla në mbarë vendin.
“Dy vite angazhohemi për futjen e mësimit njëturnësh në të gjitha komunat dhe shkollat ku kjo është e mundur. Përfitimet janë të shumëfishta – fëmijët e fillojnë mësimin në mëngjes, kur janë më të përqendruar për të mësuar. Qëndrojnë më gjatë në shkollë dhe duhet të qëndrojnë, sepse kanë 900 orë më pak se bashkëmoshatarët e tyre deri në moshën 15 vjeç. Socializohen më shumë, gjë që është e rëndësishme sidomos për mjediset dhe shkollat multietnike, dhe kursehen mjete në funksionimin e objekteve shkollore”, tha Janeska.
Ajo shtoi se Qeveria u jep mbështetje komunave për përshpejtimin e këtij procesi përmes zgjerimit të kapaciteteve ekzistuese shkollore.
“Aktualisht investojmë në ndërtimin e klasave në 6 shkolla, njëra prej tyre është pikërisht kjo. Ndërkohë po përgatiten, dhe një pjesë janë tashmë të përgatitura, gjithsej 15 projekte për ndërtimin e klasave në shkolla të tjera. Aktivitetet në terren fillojnë gradualisht nga muaji nëntor i këtij viti, ndërsa të gjitha duhet të nisin deri në pranverën e ardhshme”, theksoi ministrja.
Kryetari Miteski informoi se shkollat në Aerodrom po përgatiten intensivisht për vitin e ri shkollor, ndërsa të gjitha tekstet mësimore tashmë kanë arritur.
Ai gjithashtu njoftoi se nxënësit e klasës së katërt edhe këtë vit do të marrin pajisje tablet, të cilat tradicionalisht sigurohen nga buxheti komunal.
