Shkup, 23 shtator, Zhurnal.mk – Ministrja e Arsimit dhe Shkencës, Vesna Janevska, paralajmëroi një koncept sipas të cilit nxënësit do të qëndrojnë në shkolla nga ora 8:00 deri në 16:30, me mësim të rregullt, por edhe me aktivitete të lira dhe interaktive, seksione të ndryshme dhe kohë për kryerjen e detyrave të shtëpisë.
Sipas Janevskës, futja e mësimit në një ndërrim dhe qëndrimi gjatë gjithë ditës në shkollë duhet të kontribuojë në rezultate më të mira të nxënësve, ndërsa njëkohësisht të mundësojë sistemimin e stafit të tepërt mësimor pas bashkimit të rreth 450 paraleleve në arsimin fillor dhe të mesëm. Ajo tha se asnjë mësues me kontratë pune në kohë të pacaktuar nuk ka mbetur pa punë.
Ministrja theksoi se më shumë se gjysma e shkollave në vend tashmë punojnë në një ndërrim – 583 shkolla fillore dhe 37 shkolla të mesme. Si sfidën më të madhe ajo e veçoi Shkupin, ku për shkak të migrimeve ka nevojë për klasa shtesë dhe zgjerim të kapaciteteve.
Janevska theksoi gjithashtu se për reforma të suksesshme në arsim nevojitet vazhdimësi dhe kohë e mjaftueshme për të ndjekur rezultatet e ndryshimeve.
