Beograd, 8 shkurt – Këngëtari i njohur maqedonas Daniel Kajmakoski (43) është rrëmbyer mbrëmjen e kaluar në Beograd, bën të ditur media serbe “Kurir”. Ngjarja ka ndodhur në afërsi të zonës së njohur “Beton Hala”, ku autorë ende të paidentifikuar e kanë marrë me forcë këngëtarin.
Sipas detajeve të para, autorët e kanë lidhur Kajmakoskin dhe e kanë transportuar me makinën e tij, duke i kërkuar një shumë prej 20,000 eurosh për lirimin e tij.
Detajet e operacionit dhe arratisja
Burime për “Kurir” bëjnë me dije se dyshohet që autorët të jenë shtetas të huaj, ndërsa nuk përjashtohet mundësia që të jenë emigrantë.
”Ata e dërguan personin e rrëmbyer drejt Rumës. Kur policia rrugore tentoi t’i ndalonte, ata u përplasën me trotuarin, braktisën automjetin dhe u arratisën në këmbë,” – deklaron burimi i cituar.
Kush është Daniel Kajmakoski?
Daniel Kajmakoski lindi në Strugë në vitin 1983. Në moshën gjashtëvjeçare, ai u shpërngul me prindërit e tij në Vjenë, ku edhe u rrit.
Ai fitoi famë të madhe pas fitores në sezonin e parë të spektaklit të talenteve “X Factor Adria”. Në vitin 2015, ai përfaqësoi Maqedoninë e Veriut në Festivalin Evropian të Këngës (Eurovision) në Vjenë me këngën “Lisja esenski” (Gjethet e vjeshtës), ndonëse nuk arriti të kualifikohej në natën finale.
