Shkup, 26 korrik Zhurnal.mk – Komuna e Karposhit ishte komuna më e goditur nga stuhia që përfshiu Shkupin, me rreth 250 automjete të dëmtuara, afërsisht 85 deri në 90 çati të dëmtuara në ndërtesa banimi, shtëpi dhe institucione të tjera, për fat të keq edhe në shkolla, si dhe rreth 100 pemë të rrëzuara, deklaroi kryetari i Komunës së Karposhit, Sotir Lukrovski, duke shtuar se dëmet janë të mëdha.
Në paraqitjen e tij në Ditarin e Sitelit, Lukrovski theksoi se komunat dhe shërbimet e qytetit reaguan me shpejtësi për sanimin e dëmeve. Ai bëri të ditur se gjatë ditës së djeshme është mbajtur një takim koordinues në Qytetin e Shkupit, ku morën pjesë të gjithë kryetarët e komunave të Shkupit, kryetarja e Qytetit të Shkupit, si dhe drejtorët e ndërmarrjeve publike.
“Intervenuam në disa shtëpi ku banorët, fjalë për fjalë, ishin nën qiell të hapur, aty ku ndërhyrja ishte më urgjente. Në një ndërtesë banimi kemi një banesë në katin e fundit, së cilës i mungojnë rreth 30 metra katrorë nga çatia dhe shiu hynte drejtpërdrejt brenda. Të gjitha këto raste i sanuam, ndërsa tani po kalojmë në vlerësimin e dëmeve materiale. Në bashkëpunim me Qytetin e Shkupit morëm vendim që secila komunë të ndajë mjete financiare, të krijojmë një fond dhe komisione përkatëse, me qëllim që qytetarët të dëmshpërblehen”, deklaroi Lukrovski.
