Tetovë, 24 maj, Zhurnal.mk – Partia Demokratike Shqiptare ka mbajtur Kongresin e saj të nëntë, ku u miratua propozimi që Menduh Thaçi të rizgjidhet në krye të partisë.
Në fjalimin e tij para delegatëve, Thaçi e cilësoi rizgjedhjen si një “nder”, por edhe si përgjegjësi të madhe, ndërsa përdori metafora sportive për ta përshkruar situatën aktuale të PDSH-së.
Ai kujtoi finalen e Ligës së Kampionëve të vitit 2005 mes Liverpool F.C. dhe AC Milan, duke e krahasuar rikthimin e Liverpoolit nga humbja 3:0 me gjendjen e partisë.
“Liverpooli e kishte emocionin si PDSH-ja, ngjyrën e kuqe si PDSH-ja… kur Gerrard doli në stadium në pjesën e dytë thoshte se uli kokën që mos t’i shoh simpatizantët. Por ata këndonin ‘You’ll Never Walk Alone’. Kështu ndihem edhe unë kur shqiptarët më thonë që nuk ec vetëm”, deklaroi Thaçi.
Ai tha se rikthimin në krye të partisë e sheh si “amnisti dhe falje” për gabimet e së kaluarës, por premtoi se do të përpiqet ta rikthejë PDSH-në politikisht.
“E marr këtë përgjegjësi me sigurinë e plotë, sikur atëherë në Stamboll Liverpooli nga 0:3 ta kthejë rezultatin dhe ta fitojë betejën përfundimtare”, u shpreh ai.
Në një pjesë të gjatë të fjalimit, Thaçi pretendoi se PDSH-ja dhe figura të saj historike kanë qenë objekt i sulmeve politike dhe, sipas tij, edhe i “shërbimeve antishqiptare”.
“Dukej se kjo është luftë politike mes PDSH-së dhe konkurrentëve shqiptarë, por ju siguroj se kjo luftë përherë ka qenë e përlyer nga shërbimet antishqiptare… Edhe Arbën Xhaferin kur e sulmojnë, edhe Menduh Thaçin kur e sulmojnë, edhe PDSH-në kur e sulmojnë, nëpërmjet këtyre i sulmojnë shqiptarët”, deklaroi ai.
Thaçi foli edhe për rolin e tij gjatë periudhës së luftës në Kosovë dhe Marrëveshjes së Ohrit, duke pretenduar se kontributi i tij është minimizuar ndër vite.
“Sot u pa që jo që kam qenë aty, por kam qenë ndër njerëzit kryesorë që e kam menaxhu këtë vullnet të shqiptarëve të Maqedonisë për të dhënë kontribut për çlirimin e Kosovës”, tha ai, duke iu referuar përcjelljes së Hashim Thaçi nga Tetova drejt Kosovës gjatë hyrjes së forcave të NATO-s.
Kreu i PDSH-së sulmoi edhe kundërshtarët politikë shqiptarë në Maqedoninë e Veriut, duke ftuar votuesit e Bashkimit Demokratik për Integrim që ta braktisin liderin e tyre dhe t’i bashkohen PDSH-së.
“Ka një dallim të madh mes meje dhe Ali Ahmetit… popullit tonë duhet t’i bëjmë apel që mos të zgjedhim njerëz të paditur”, deklaroi Thaçi.
Ai kritikoi edhe koalicionin VLEN, duke thënë se PDSH-ja do ta trajtojë atë si kundërshtar të ashpër politik dhe se, sipas tij, do ta mposhtë në zgjedhjet e ardhshme.
Në fund, Thaçi akuzoi kryeministrin e Maqedonia e Veriut, Hristijan Mickoski, për qasje provokuese ndaj shqiptarëve, duke pretenduar se ai paraqitet vetëm si “kryeministër i maqedonasve”.
“Politika e tij është provokuese ndaj shqiptarëve. Ai mundohet të krijojë kënaqësi te maqedonasit sepse ky na qenka maqedonasi më i mirë për të shkelur shqiptarët”, deklaroi Thaçi.
