Bruksel/Shkup, 24 Mars, Zhurnal.mk – Komisionerja Evropiane përgjegjëse për zgjerimin e Bashkimit Evropian, Marta Kos, dje i ka përsëritur thirrjet e BE-së drejtuar qeverisë dhe parlamentit të Maqedonisë së Veriut për të përfshirë komunitetin bullgar në Kushtetutën e saj, që është një parakusht që nga viti 2022 në mënyrë që vendi të mund të hapë bisedimet e anëtarësimit në bllokun evropian.
Thirrja u bë gjatë takimit të saj me Ministrin e Punëve të Jashtme, Timco Mucunski, në Bruksel, sipas një zyrtari të Komisionit të BE-së, shkruan Zhurnal.mk.
“Gjatë takimit, Komisionerja Kos inkurajoi Maqedoninë e Veriut të miratojë ndryshime kushtetuese si një parakusht për çdo hap të mëtejshëm në procesin e anëtarësimit dhe të intensifikojë përpjekjet për reformat kryesore të BE-së, veçanërisht në sundimin e ligjit”, tha një zyrtar i Komisionit Evropian për dtt-net.com.
Kryeministri Hristijan Mickoski po refuzon që të ndryshojë kushtetutën dhe kërkon që së pari Bullgaria dhe BE-në të përmbushin dy kushtet e tij, të cilat kanë të bëjnë me akomodimin e të drejtave të komunitetit maqedonas në Bullgari nga ana e Bullgarisë dhe me marrjen e garancive formale nga Sofja dhe BE-ja mbi identitetin dhe gjuhën maqedonase, të cilat bullgarët refuzojnë t’i njohin.
Mickoski dhe VMRO-DPMNE kanë frikë se Bullgaria mund ta përdorë përsëri të drejtën e vetos në BE gjatë negociatave të anëtarësimit dhe të vendosë kushte shtesë që mund të lidhen me gjuhën maqedonase dhe historinë, pasi Bullgaria nuk e njeh gjuhën maqedonase dhe e trajton atë si derivat të gjuhës bullgare.
Sipas zyrtarit të Komisionit të BE-së, Kos dhe Mucuncki diskutuan gjithashtu për “përparimin e vazhdueshëm në planin e veprimit për pakicat dhe standardet e tjera të hapjes për kapitullin 1 të procesit të anëtarësimit, plus marrëdhëniet e fqinjësisë së mirë”.
Kapitulli 1 i negociatave të anëtarësimit ka të bëjë me lëvizjen e lirë të mallrave.
Zyrari tha se Kos gjithashtu i kërkoi qeverisë në Shkup të përqendrohet në miratimin e një ligji të rishikuar për Këshillin Gjyqësor, kodin zgjedhor, kodin penal dhe kodin e procedurës penale”.
