Shkup, 17 shtator, Zhurnal.mk – Futja e bullgarëve në Kushtetutë është kushti që Maqedonia duhet ta përmbushë për ta vazhduar procesin e eurointegrimeve, deklaroi komisionerja evropiane për zgjerim Marta Kos në intervistë për televizionin bullgar “BNT”. Ajo u pyet edhe nëse dhe si Komisioni Evropian mund të ndikojë mbi Shkupin që t’i bëjë ndryshimet kushtetuese dhe u përgjigj se beson që me qeverinë e re bullgare do të gjendet mënyrë që procesi me Maqedoninë të vazhdojë.
“Ky është një pyetje shumë e mirë dhe do të isha shumë e lumtur nëse e shfrytëzojmë këtë moment të zgjerimit edhe për Maqedoninë e Veriut. Besoj te qeveria e re bullgare, me të cilën bashkëpunoj shumë mirë. Të gjithë ne së bashku do të gjejmë mënyrë ta shtyjmë procesin përpara me Maqedoninë e Veriut. Sigurisht, qeveria në Maqedoninë e Veriut duhet ta mbajë premtimin e saj. Ata duhet ta ndryshojnë Kushtetutën e tyre, kjo është e dakorduar ndërmjet Maqedonisë së Veriut dhe 27 vendeve anëtare të BE‑së. Pasi të bëhet kjo, do të llogaris edhe në mbështetjen nga vendi juaj, që të vazhdojmë përpara edhe me Maqedoninë e Veriut”, deklaroi Kos.
Në intervistën për “BNT” komisionerja Kos tha se zgjerimi i BE‑së mbetet prioritet dhe se periudha e ardhshme do të jetë e rëndësishme për vendet kandidate.
“Kjo vjeshtë do të jetë vjeshtë e zgjerimit. Më gëzon shumë që po e intensifikojmë procesin. Po përgatisim udhërrëfyes për vendet që janë më përpara në negociata. Mali i Zi është më afër anëtarësimit, ndërsa për Shqipërinë, Moldavinë dhe Ukrainën do të paraqesim udhërrëfyes në të cilët do të jenë të shënuar të gjitha hapat teknikë që duhet të ndërmerren deri në fund të mandatit tonë”, tha Kos.
Ajo theksoi se paralelisht me mbështetjen për vendet kandidate, Komisioni Evropian po punon edhe për përgatitjen e vendeve anëtare për zgjerim të ri.
