Shkup, 17 shtator, Zhurnal.mk – Nga gjithsej 623 ankesa për të cilat ka vepruar Agjencia për mbrojtjen e të drejtës për qasje të lirë në informata me karakter publik në vitin 2025, madje 438, pra pothuajse 70 për qind, kanë qenë për mosveprim ose heshtje të institucioneve në afatet e përcaktuara me ligj, informoi drejtori i Agjencisë Petar Gajdov gjatë arsyetimit të Raportit Vjetor për vitin 2025.
Raporti u paraqit para Komisionit parlamentar për sistemin politik dhe marrëdhëniet ndërmjet komuniteteve, ndërsa Gajdov theksoi se Agjencia gjatë vitit të kaluar ka vepruar për të gjitha ankesat e paraqitura, duke respektuar afatet ligjore dhe duke u përpjekur të sigurojë zbatim të qëndrueshëm të të drejtës për qasje në informata me karakter publik.
Sipas të dhënave të prezantuara, numrin më të madh të ankesave i kanë paraqitur personat fizikë, gjithsej 344, pasuar nga organizatat joqeveritare, shoqatat dhe fondacionet me 194 ankesa.
Personat juridikë kanë paraqitur 51 ankesa, ndërsa gazetarët dhe shoqatat e gazetarëve 34 ankesa.
Gajdov theksoi se e drejta për qasje të lirë në informata paraqet një mjet të rëndësishëm për realizimin e interesit publik, mbikëqyrjen mbi punën e institucioneve dhe kontrollin e shpenzimit të mjeteve publike.
Sipas tij, qasja e lirë në informata me karakter publik funksionon si mjet parandalues në luftën kundër korrupsionit përmes forcimit të transparencës institucionale, llogaridhënies dhe përgjegjësisë.
Ai vlerësoi se institucionet gjithnjë e më shumë i përdorin faqet e tyre të internetit për publikimin proaktiv të informatave, por theksoi se ende ekzistojnë dobësi serioze në respektimin e detyrimeve ligjore.
