Shkup, 10 korrik, Zhurnal.mk – Hristijan Mickoski thekson se Maqedonia ka arritur inflacionin më të ulët në rajon. Por qytetarët nuk jetojnë nga raportet statistikore, por nga pagat dhe nga ajo që mund të blejnë në markete me ato paga, thuhet në komunikatën e LSDM-së.
Inflacioni mund të jetë ulur, por te shporta e konsumit ende është e vështirë të arrihet. Edhe në këtë moment, inflacioni është dukshëm më i lartë se sa parashikimet e Mickoskit në programin qeveritar dhe në buxhetin për vitin 2026.
Çmimet e produkteve bazë mbeten të larta, ndërsa pagat janë ndër më të ulëtat në Evropë. Paga minimale në Maqedoni është dukshëm më e ulët se në vendet fqinje, ndërsa paga mesatare nuk mjafton për një jetë të dinjitetshme.
Edhe më shqetësues është fakti se investimet e huaja kanë rënë mbi 60% krahasuar me periudhën para marrjes së pushtetit nga kjo Qeveri. Në vend të zhvillimit dhe vendeve të reja të punës, po shohim stagnim ekonomik dhe dalje të kapitalit.
Mickoski përpiqet të flasë për “suksese ekonomike”, por realiteti është krejt tjetër. Maqedonia nën drejtimin e tij është shndërruar në “ekonomi të frigoriferëve bosh” — një vend ku mburren me shifra, ndërsa qytetarët luftojnë të mbijetojnë.
Ndërkohë, grupi kriminal i VMRO-së merret me propagandë dhe me të dhëna të selektuara statistikore, ndërsa njerëzit përballen me jetë gjithnjë e më të shtrenjtë, të ardhura të ulëta dhe të ardhme të pasigurt. Kjo nuk është sukses. Kjo është përkeqësim i vazhdueshëm i gjendjes ekonomike dhe sociale, të cilin përpiqen ta fshehin me fraza boshe.
Qytetarët nuk hanë inflacion. Ata hanë atë që mund të përballojnë. E në këtë moment, ajo është gjithnjë e më pak.
