Paris, 26 tetor, Zhurnal.mk – Presidenti francez, Emmanuel Macron deklaroi sot se është anormale që, gjashtë muaj para zgjedhjeve presidenciale, vendi ynë të jetë në këtë gjendje trazirash duke bërë thirrje që skenat e kaosit të parë më 17 tetor në qytete të shumta të mos përsëriteshin kurrë.
“Ne do të vazhdojmë të qëndrojmë të vendosur”, tha ai gjatë një vizite në Marsejë, para anëtarëve të forcave të sigurisë, të cilët i falënderoi për përpjekjet e tyre.
“Nëse e bëjmë punën tonë mirë së bashku, kjo është një lëvizje që do të qetësohet sepse do të përmbushim pritjet legjitime dhe sepse rendi do të ruhet”, theksoi ai.
Macron vlerësoi se edhe e shtuna e ardhshme do të jetë sërish një ditë me rrezik, për shkak të protestave të paralajmëruara.
Ai bëri të ditur se itineraret e demonstratave do të mbeten jashtë qendrave të qyteteve, me qëllim mbrojtjen e rendit
Presidenti, i cili vizitoi sot bashkinë e Marsejës, godinë që ishte pushtuar për një kohë të shkurtër nga protestuesit më 17 tetor, pranoi se autoritetet nuk e kishin parashikuar aspak atë ditë mobilizimi dhe se forcat e policisë nuk ishin angazhuar në numër dhe përmasa të përshtatshme me situatën.
