Lujan, 11 nëntor, Zhurnal.mk – Më shumë se 2 milionë persona, sipas autoriteteve lokale, morën pjesë të mërkurën në meshën e fundit në ajër të hapur të kremtuar nga Papa Leoni XIV në Luján, vendi më i rëndësishëm i pelegrinazhit katolik në Argjentinë.
Luján, që ndodhet rreth 75 kilometra larg Buenos Airesit, është një nga qendrat kryesore të besimit katolik në vend.
Aty ndodhet shenjtërorja kushtuar Virgjëreshës së Lujánit, e nderuar që prej shekullit XVII dhe e lidhur ngushtë me identitetin kombëtar dhe fetar të Argjentinës. Gati një shekull më parë, Papa Piu XI e shpalli atë “Pajtore të Argjentinës”.
Papa 71-vjeçar përfundoi të mërkurën vizitën në Argjentinë, pas ndalesës në Uruguai dhe përpara udhëtimit drejt Perusë, ku shërbeu si misionar dhe ipeshkëv për 20 vjet.
Kjo vizitë është pjesë e një turi intensiv 12-ditor në Amerikën Latine dhe udhëtimi i tij i parë që prej ndërhyrjes kirurgjikale katër javë më parë për shkak të një kanceri në mushkëri.
Gjatë katër ditëve në Argjentinë, Papa Leoni XIV zhvilloi disa aktivitete që tërhoqën një numër të jashtëzakonshëm besimtarësh.
Sipas të dhënave të autoriteteve lokale, deri në 2.5 milionë persona morën pjesë të hënën në një meshë në ajër të hapur në Buenos Aires, ndërsa të martën rreth 650 mijë besimtarë u mblodhën në Kordoba.
Po atë mbrëmje, një tjetër milion persona morën pjesë në një vigjilje me të rinjtë në Buenos Aires.
Herët të mërkurën në mëngjes, kreu i Kishës Katolike vizitoi burgun Devoto, një institucion me reputacion të rëndë, por i njohur edhe nga paraardhësi i tij, Papa Françesku, gjatë kohës kur ishte kryepeshkop i Buenos Airesit.
Gjatë takimit me të burgosurit, Papa u përpoq t’u përcillte mesazhin se burgu, pavarësisht kufizimeve të tij të dukshme, mund të jetë gjithashtu një vend ndryshimi dhe shprese, ku mund të lindin “drita të vogla shprese”.
Burgu Devoto, i fundit që funksionon brenda kufijve të qytetit të Buenos Airesit, është në gjendje të amortizuar dhe pothuajse jashtë përdorimit, gati një shekull pas hapjes së tij.
Megjithatë, për shumë vite ai ka qenë simbol i mbipopullimit të burgjeve, duke strehuar deri në 1 600 të burgosur, si persona të dënuar për vepra penale të zakonshme, ashtu edhe të burgosur politikë gjatë diktaturës së viteve 1976-1983.
Gjatë asaj periudhe, burgu Devoto shërbeu gjithashtu si një qendër e fshehtë ndalimi dhe torture, të njohura në Argjentinë me akronimin “CCD”, pjesë e një rrjeti që përfshinte qindra qendra të tilla në vend.
Papa Françesku, i njohur atëherë si Jorge Bergoglio, e vizitonte rregullisht burgun Devoto, ku lante këmbët e të burgosurve, një traditë që e vijoi edhe më vonë në Romë, me rastin e së Enjtes së Madhe.
Ai gjithashtu kremtonte mesha për Krishtlindje dhe mbante korrespondencë me disa prej të burgosurve.
