Moska fton Gjermaninë, Francën dhe Britaninë e Madhe për bisedime mbi Ukrainën

Nga D V
A+ A-
Rivendos

Moskë, 20 nëntor, Zhurnal.mk – Rusia ka ftuar përfaqësues të Gjermanisë, Francës dhe Britanisë së Madhe në Moskë për bisedime mbi luftën në Ukrainë, njoftuan sot zyrtarët rusë.

Ftesa shihet si një sinjal i mundshëm për vendet evropiane, të cilat kërkojnë të përfshihen në negociatat e udhëhequra nga Shtetet e Bashkuara të Amerikës për arritjen e një marrëveshjeje paqeje.

Zëvendësministri i Jashtëm rus, Sergei Ryabkov deklaroi se vizita e përfaqësuesve të koalicionit E3, që përfshin Gjermaninë, Francën dhe Britaninë e Madhe, mund të organizohet brenda një kohe të shkurtër.

“Jemi në pritje të një përgjigjeje”, u shpreh diplomati, sipas agjencisë ruse të lajmeve “Interfax”.

Ftesa vjen pasi presidenti rus, Vladimir Putin deklaroi dje se Moska u kishte propozuar përfaqësuesve evropianë, përmes kanaleve diplomatike, të zhvillonin bisedime në kryeqytetin rus, për çështjet e sigurisë në Evropë.

Megjithatë, Ryabkov theksoi se një vizitë e tillë nuk do të nënkuptonte automatikisht përfshirjen e vendeve evropiane në negociatat për përfundimin e luftës në Ukrainë, të nisur nga Rusia gati pesë vjet më parë.

Javën e kaluar, Moska pranoi për herë të parë, përfshirjen e evropianëve në negociata, pas kërkesave të paraqitura nga negociatorët amerikanë, gjatë bisedimeve të drejtpërdrejta mes palëve ndërluftuese në Abu Dabi.

Megjithatë, Rusia është ankuar se vendet evropiane, ende nuk kanë caktuar një ekip negociator dhe nuk kanë përcaktuar një qëndrim të përbashkët për bisedimet.

“Duhet të kuptojmë se çfarë po sjellin evropianët në këto negociata”, deklaroi dje Putini.

“Për këtë arsye, u kemi propozuar evropianëve, përmes kanaleve diplomatike, që të vijnë në Moskë për të sqaruar qëndrimin e tyre”, shtoi presidenti rus.

Gjermania mirëpret ftesën e Moskës

Ndryshe nga Shtetet e Bashkuara të Amerikës, vendet evropiane nuk kanë caktuar ende një negociator të posaçëm apo një ekip, që do t’i përfaqësojë në bisedimet për Ukrainën.

Pas thirrjeve në rritje, përfshirë edhe ato të Italisë, për emërimin e një përfaqësuesi të përbashkët, udhëheqësit e BE-së ranë dakord javën e kaluar që Gjermania, Franca, Britania e Madhe, Italia dhe Polonia, së bashku me institucionet e Bashkimit Evropian, të përfaqësojnë palën evropiane në bisedimet me Rusinë për Ukrainën.

Ministri gjerman i Mbrojtjes, Boris Pistorius mirëpriti sot ftesën e Putinit drejtuar përfaqësuesve evropianë.

“Refuzimi i ftesës së Moskës do të dërgonte një mesazh krejtësisht të gabuar. Duhet të bisedojmë. Vetëm përmes dialogut mund të arrijmë rezultate”, deklaroi Pistorius gjatë një vizite në Varshavë.

Megjithatë, ai theksoi se Rusia duhet të tregojë gatishmëri për të negociuar një armëpushim, në mënyrë që bisedimet të kenë kuptim.

Anëtarësimi i Ukrainës në NATO mbetet vijë e kuqe për Moskën

Pavarësisht shenjave të afrimit diplomatik, qëndrimet e Rusisë dhe Ukrainës, si dhe të aleatëve evropianë të Kievit, mbeten larg njëri-tjetrit.

Putini, pas takimit tripalësh historik me presidentin amerikan, Donald Trump dhe presidentin kinez, Xi Jinping dje në Shenzhen, sinjalizoi gatishmëri për kompromis lidhur me Ukrainën. Megjithatë, ai këmbënguli se Rusia nuk do të tërhiqet nga territoret ukrainase që ka pushtuar gjatë luftës, një nga kërkesat kryesore të Kievit.

I pyetur nëse vazhdonte të kërkonte që NATO-ja të tërhiqej në pozicionet që kishte përpara zgjerimit drejt lindjes, Putini tha se rrethanat kishin ndryshuar dhe se Rusia e kuptonte se nuk mund të kthehej në situatën e viteve 1990. Megjithatë, ai përsëriti se Moska nuk do të tërhiqej nga territoret e pushtuara në Ukrainë.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër