Shkup, 26 prill Zhurnal.mk – Hekurudhat e Maqedonisë Transport ka nënshkruar marrëveshje me Banka Evropiane për Rindërtim dhe Zhvillim (BERZH) për furnizimin me të paktën pesë lokomotiva të reja për transport mallrash, ndërsa paralelisht po zhvillohen bisedime edhe me Banka Botërore për blerjen e trenave të rinj.
Zëvendëskryeministri Aleksandar Nikolloski deklaroi se këto investime përbëjnë një nga projektet më të rëndësishme për vendin, duke theksuar se përveç modernizimit të hekurudhës, po punohet edhe në projekte të tjera madhore si Treni Urban dhe furnizimi me autobusë elektrikë.
Sipas tij, projekti i Trenit Urban pritet të ketë ndikim të drejtpërdrejtë në përmirësimin e jetës në Shkup, duke ulur ndotjen, duke lehtësuar jetesën në zonat periferike dhe duke nxitur përdorimin e transportit publik në vend të makinave.
Linja e parë e Trenit Urban, e cila do të përfshijë itinerarin Zelenikovë – Draçevë – Lisicë – Kisela Vodë – Aerodrom deri te stacioni i ri hekurudhor në Shkup, pritet të përfundojë deri në fund të qershorit dhe të vihet në funksion nga 1 shtatori.
Ndërkohë, në bashkëpunim me Fakultetin e Ndërtimtarisë, po përgatiten edhe dy linja të tjera: njëra që do të lidhë stacionin e ri hekurudhor me Butelin, Shkupin e Veriut dhe Gjorçe Petrov, dhe tjetra që do të kalojë përmes Autokomandës, Maxharit dhe do të përfundojë në Ilinden.
Autoritetet theksojnë se këto projekte synojnë ta afrojnë sistemin e transportit publik të vendit me standardet e qyteteve më të mëdha evropiane, duke shfrytëzuar dhe përmirësuar infrastrukturën ekzistuese.
