Shkup, 6 gusht, Zhurnal.mk – Zëvendëskryeministri dhe ministri i Transportit, Aleksandar Nikolloski, deklaroi sot se me realizimin e Koridorit 8 po dëshmohet se projektet strategjike mund të realizohen dhe se problemet e së kaluarës mund të tejkalohen.
Nikolloski e theksoi këtë para nënshkrimit të marrëveshjeve për financimin e ndërtimit të segmentit hekurudhor Kriva Pallankë – Deve Bair, pjesë e krahut lindor të Koridorit 8.
Ai nënvizoi se nënshkrimi i marrëveshjeve është vazhdimësi e vizionit të Qeverisë që Maqedonia të shfrytëzojë pozicionin e saj si nyje e koridoreve evropiane të transportit 8 dhe 10.
“Ndërtimi i Koridorit 8 është një nga prioritetet kryesore të Qeverisë. Ky është një ditë jashtëzakonisht i rëndësishëm, sepse pas gati dy vitesh punë arrijmë te një projekt real dhe i realizueshëm”, tha Nikolloski.
Ai informoi se është arritur marrëveshje me Bullgarinë për ndërtimin e një tuneli hekurudhor ndërkufitar që duhet të lidhë të dy shtetet.
“Presim që në fund të këtij muaji të mbahet takimi i dytë ndërqeveritar në Shkup, ndërsa të dy shtetet do të dërgojnë letër të përbashkët në BE, BEI dhe BERZH për sigurimin e mjeteve grant për ndërtimin e tunelit”, shtoi Nikolloski.
Për segmentin e tretë të hekurudhës së Koridorit 8, përmes Kornizës Investuese për Ballkanin Perëndimor të Bashkimit Evropian, janë siguruar 149 milionë euro mjete grant.
Nikolloski njoftoi se gjatë këtij viti pritet fillimi i aktiviteteve ndërtimore, ndërsa në vjeshtë duhet të zgjidhet edhe kompania e ndërtimit.
“Ka tashmë tender aktiv për zgjedhjen e mbikëqyrjes, i cili zhvillohet në dy faza, ndërsa tenderi për ndërtim do të realizohet në një fazë”, informoi ministri i Transportit.
Në nënshkrimin e marrëveshjeve në Qeveri morën pjesë edhe kryeministri Hristijan Mickoski, ministrja e Financave Gordana Dimitrieska‑Koçoska, përfaqësues të BE‑së, BERZH‑it, BEI‑së dhe drejtori i Hekurudhave – Infrastrukturë, Sinisha Ivanovski.
