Prishtinë, 25 maj Zhurnal.mk – Kryetari i NISMA Socialdemokrate, Fatmir Limaj, ka njoftuar se ka zhvilluar takim me kryetarin e Partisë Demokratike të Kosovës, Bedri Hamza, me të cilin kanë arritur marrëveshje për nisjen e një bashkëpunimi strategjik politik mes dy subjekteve.
Sipas Limajt, NISMA Socialdemokrate do ta mbështesë PDK-në dhe kandidatin e saj për kryeministër, Bedri Hamzën, në zgjedhjet e ardhshme.
Ai bëri të ditur se bashkëpunimi do të përfshijë aspektin politik, elektoral, qeverisës dhe organizativ, me synim krijimin e një partneriteti afatgjatë në funksion të stabilitetit institucional, zhvillimit ekonomik dhe forcimit të shtetit të Kosovës.
Limaj theksoi se ky bashkëpunim mbështetet në vlerat shtetformuese, orientimin euroatlantik, partneritetin me Shtetet e Bashkuara të Amerikës, si dhe respektin për luftën çlirimtare dhe rolin historik të UÇK-së.
Ai shtoi se Kosova ka nevojë për më shumë bashkëpunim politik dhe përgjegjësi institucionale, duke e cilësuar këtë marrëveshje si hap drejt një qeverisjeje stabile dhe funksionale.
