Parlamenti i Lituanisë miratoi sot një ndryshim ligjor që i jep ushtrisë kompetenca më të gjera dhe më të shpejta për të vepruar ndaj dronëve që shkelin hapësirën ajrore të vendit.
Ndryshimi i ligjit synon dronët që përbëjnë kërcënim për sigurinë kombëtare të këtij shteti anëtar të BE-së dhe NATO-s, duke shtuar dispozita të reja pas rritjes së shkeljeve ajrore në rajon, sipas një deklarate të parlamentit në Vilnius.
Deri tani, ushtria kishte të drejtë të vepronte vetëm kundër objekteve fluturuese që përdoreshin si armë ose që hynin në zona të ndaluara duke rrezikuar pronën shtetërore.
Me ndryshimin e ri, dronët mund të rrëzohen sa herë që shkelin rregullat në zonat e ndaluara ose të kufizuara.
Më herët këtë muaj, dronë ushtarakë depërtuan në hapësirën ajrore të Polonisë dhe kështu të NATO-s gjatë një sulmi rus ndaj Ukrainës. Disa prej tyre u rrëzuan për herë të parë nga forcat polake dhe aleatët e NATO-s.
Shkelje të ngjashme ajrore janë regjistruar edhe mbi territorin e Lituanisë që prej pushtimit rus të Ukrainës në shkurt 2022.
