Prodhuesi kinez i dronëve DJI përshëndeti të hënën një vendim të gjykatës së apelit në ShBA për të rishqyrtuar lidhjet e saj të dyshuara me ushtrinë e Kinës, duke thënë se mbetet në pritje që “situata të sqarohet ndërsa çështja ecën përpara”.
Në tetor 2022 Departamenti Amerikan i Mbrojtjes e vendosi për herë të parë DJI në listën e zezë të kompanive të dyshuara ushtarake kineze. Ndërkohë në tetor 2024 kompania DJI ngriti një padi ndaj Departamentit të Mbrojtjes.
DJI tha në një deklaratë se vendimi i gjykatës “është një hap i rëndësishëm drejt korrigjimit të një përcaktimi të pajustifikuar”, duke përsëritur se ajo është një kompani jo-ushtarake, që ka dënuar fuqimisht përdorimin e produkteve të saj në luftime dhe ka ndërmarrë hapa aktivë për ta parandaluar atë.
Kompania DJI është ndër prodhuesit kryesorë të dronëve në botë, me produkte që zënë mbi gjysmën e tregut të dronëve komercialë në Amerikë, referuar statistikave. Sipas kompanisë, vetëm në vitin 2023 ajo kontribuoi me 515 milionë dollarë në sektorin bujqësor të ShBA-së.
