Riad, 26 tetor, Zhurnal.mk – Rebelët Houthi të Jemenit kanë vijuar sulmet ndaj Arabisë Saudite, ndërsa zyrtarë të lartë sauditë, turq dhe pakistanezë po zhvillojnë sot në Teheran bisedime vendimtare me Iranin, mes paralajmërimeve për rifillimin e luftës.
Shpërthime të reja u dëgjuan gjatë natës në Riad, ndërsa autoritetet u dërguan mesazhe paralajmëruese banorëve, pasi rebelët Houthi, të cilët mbështeten nga Irani, morën përsipër një tjetër sulm ndaj aeroportit ndërkombëtar të kryeqytetit saudit .
Arabia Saudite, eksportuesja më e madhe e naftës në botë, është përfshirë thellësisht në konfliktin tetëmujor, pas rifillimit në korrik të luftimeve në përplasjen e saj të gjatë me Huthit.
Ministri saudit i Mbrojtjes, princi Khalid bin Salman, është pjesë e delegacionit që do të udhëtojë drejt Teheranit. Takimi përfshin përfaqësues të tre vendeve që nënshkruan një aleancë mbrojtjeje në Mekë në gusht.
Vizita zhvillohet në një moment kur Shtetet e Bashkuara, Irani dhe Izraeli kanë paralajmëruar mundësinë e rifillimit të armiqësive.
Tensionet janë rritur gjithashtu në prag të zgjedhjeve vendimtare nesër në Izrael dhe zgjedhjeve të mesmandatit në SHBA javën e ardhshme, ku republikanët e presidentit Donald Trump po përpiqen të ruajnë kontrollin e të dy dhomave të Kongresit amerikan.
Në takimin e së sotëm do të marrë pjesë edhe Mohsen Rezaei, zyrtar i lartë iranian i sigurisë, së bashku me princin Khalid, shefin e ushtrisë pakistaneze, gjeneralin Asim Munir, dhe drejtuesin e inteligjencës turke, Ibrahim Kalin.
“Ky takim historik në Teheran mund të jetë shansi i fundit përpara se përshkallëzimi të dalë jashtë kontrollit”, shkroi në rrjetin social X analisti dhe studiuesi saudit i sigurisë, Hesham Alghannam, duke e cilësuar atë si një përpjekje për të shmangur përshkallëzimin përpara se të jetë tepër vonë.
Sipas tij, prania e zyrtarëve ushtarakë dhe të sigurisë në këtë nivel tregon se koha në dispozicion është jashtëzakonisht e kufizuar.
Ndërsa shpërthimet dëgjoheshin në Riad dhe autoritetet u dërgonin banorëve mesazhe për një “kërcënim ajror armiqësor”, koalicioni i udhëhequr nga Arabia Saudite, që lufton kundër Houthive, njoftoi se kishte goditur në Jemen platforma lëshimi raketash dhe objekte magazinimi.
Rebelët Houthi deklaruan se kishin sulmuar sërish aeroportin ndërkombëtar King Khalid të Riadit. Ky objekt, i goditur vazhdimisht, ka qëndruar kryesisht i mbyllur që prej 13 tetorit, kur një sulm i rëndë shkaktoi 13 viktima dhe mbi 300 të plagosur.
Përpjekjet për ndërmjetësim mes SHBA-së dhe Iranit janë udhëhequr nga Katari dhe Pakistani. Një delegacion nga Katari vizitoi dje Teheranin, bëri të ditur zëdhënësi i Ministrisë së Jashtme iraniane, Esmaeil Baqaei.
“Rajoni ynë ndodhet nën ndikimin e tensioneve serioze dhe vendet fqinje po përpiqen të përcjellin mesazhe dhe të paraqesin iniciativa”, deklaroi sot Baqaei.
Andreas Krieg, nga kompania londineze e analizës së rrezikut “MENA analytica”, e cilësoi praninë e princit Khalid në Teheran si “jashtëzakonisht domethënëse”, duke e përshkruar atë si arkitektin strategjik të Arabisë Saudite.
Princi Khalid, vëllai i princit të kurorës dhe udhëheqësit de facto të vendit, Mohammed bin Salman, është shndërruar në një nga ndërmjetësuesit kryesorë diplomatikë të Arabisë Saudite dhe është dërguar në disa misione të ndjeshme rajonale.
Sipas Krieg, udhëtimi i tij i drejtpërdrejtë drejt Iranit në këtë moment delikat është një sinjal i fortë se mbretëria nuk po qëndron pasive përballë zhvillimeve.
Ai shtoi se aleanca e krijuar në Mekë po përpiqet t’i sinjalizojë Iranit se vendet pjesëmarrëse janë të gatshme të bashkëpunojnë për mbrojtjen e Arabisë Saudite dhe kufijve të saj.
Sipas analistit, në rast se Irani vendos të përshkallëzojë situatën, veçanërisht nëse Izraeli dhe SHBA-ja ndërmarrin sulme, Teherani mund të godasë Arabinë Saudite dhe të përballet me pasoja.
