Shkup, 05 tetor, Zhurnal.mk – Ministri i Punëve të Jashtme, Timço Mucunski, sot në Shkup zhvilloi një takim me zëvendësndihmësin e Sekretarit të Përgjithshëm të NATO-s për Partneritete, ambasadorin Kevin Hamilton, i cili po qëndron për një vizitë pune njëditore në Republikën e Maqedonisë së Veriut, transmeton Zhurnal.mk.
Siç bëri të ditur Mucunski, gjatë takimit u shkëmbyen mendime dhe informacione mbi zhvillimet aktuale në Ballkanin Perëndimor, bashkëpunimin rajonal dhe sfidat e sigurisë me të cilat përballet rajoni, si dhe për rolin dhe aktivitetet e NATO-s, duke pasur parasysh rëndësinë strategjike të rajonit për Aleancën.
Mucunski theksoi kontributin e Republikës së Maqedonisë së Veriut në Aleancë dhe në nismat rajonale, si dhe interesin e përbashkët për stabilitetin dhe sigurinë e rajonit dhe më gjerë.
Sipas tij, takimi dhe vizita e ambasadorit Hamilton përbëjnë një mundësi për thellimin e mëtejshëm të dialogut me NATO-n dhe për shkëmbimin e qëndrimeve mbi çështje me interes të përbashkët, me theks të veçantë te stabiliteti rajonal, siguria dhe bashkëpunimi praktik.
