Ambasadori Michel Tarran u takua sot me Ulsi Manjën, kryetar i Komisionit për Çështjet Ligjore dhe Administratën Publike të Kuvendit të Shqipërisë, për të diskutuar bashkëpunimin në vijim mbi reforma kyçe legjislative dhe institucionale.
Diskutimi u përqendrua në disa procese të rëndësishme të reformës ligjore, përfshirë legjislacionin në fushën e drejtësisë penale, kuadrin kundër korrupsionit dhe ligjin e miratuar së fundmi “Për parandalimin dhe mbrojtjen nga dhuna ndaj grave dhe dhuna në familje”.
Ambasadori Tarran theksoi se Prezenca e OSBE-së ofroi komente të detajuara ligjore dhe kontribut ekspertësh gjatë procesit të konsultimit publik. Shumica e këtyre rekomandimeve u reflektuan në tekstin përfundimtar, duke kontribuar në një kuadër më gjithëpërfshirës dhe të përqendruar te viktima, në përputhje me standardet ndërkombëtare.
Manja shprehu vlerësimin për bashkëpunimin e vazhdueshëm të Prezencës së OSBE-së dhe për cilësinë e lartë të komenteve ligjore, duke theksuar se ato janë të vlefshme për punën e Komisionit dhe për procesin e përgjithshëm legjislativ. Ai kërkoi që Prezenca të asistojë anëtarët e rinj të komisionit me trajnime dhe ngritje kapacitetesh mbi procedurat parlamentare dhe legjislative në këtë sesion të ri legjislativ.
Takimi trajtoi, gjithashtu, ecurinë e nismës për e-Legjislacionin, që synon rritjen e transparencës, gjurmueshmërisë dhe efikasitetit në procesin e hartimit të ligjeve. Manja theksoi rëndësinë e proceseve të tilla për përfitimet afatgjata dhe shprehu gatishmërinë e komisionit që ai drejton për t’u angazhuar më tej në përmirësimin e procesit dhe për të ofruar të gjithë mbështetjen e nevojshme për zbatimin me sukses të e-Legjislacionit në Kuvendin e Shqipërisë.
Ambasadori Tarran rikonfirmoi gatishmërinë e Prezencës së OSBE-së për të vijuar bashkëpunimin dhe për të ofruar ekspertizë teknike dhe mbështetje këshillimore për Komisionin, si edhe për nevoja të tjera të Kuvendit.
