Gostivar, 8 mars – Në selinë e Partisë Demokratike Turke, sot u mbajt mbledhja e Bordit Qendror Drejtues dhe e Këshillit të Asamblesë Qendrore, ku u diskutuan në mënyrë të detajuar zhvillimet aktuale politike në vend.
Gjatë takimit, anëtarët e partisë trajtuan disa çështje të rëndësishme që janë aktualisht në fokus të debatit publik, përfshirë Ligjin për Njësinë e Vetme Zgjedhore dhe Ligjin për Arsimin e Lartë. Përmes një analize dhe vlerësimi të gjerë të këtyre temave, drejtuesit e partisë përcaktuan edhe udhërrëfyesin dhe prioritetet politike për periudhën e ardhshme.
Nga Partia Demokratike Turke u theksua se angazhimi i tyre do të vazhdojë me vendosmëri për të ndërtuar politika të forta dhe të qëndrueshme, të cilat synojnë mbrojtjen e të drejtave dhe interesave të komunitetit që përfaqësojnë.
Pas përfundimit të mbledhjes, pjesëmarrësit u bashkuan në një iftar të përbashkët, ku u nda edhe fryma e unitetit, vëllazërisë dhe solidaritetit që sjell muaji i Ramazanit.
