Shkup, 24 korrik, Zhurnal.mk – Ndërmarrja Publike Komunale “Sharri” ka dalë me një njoftim ku siguron banorët se uji i pijshëm në Tetovë nuk paraqet asnjë rrezik për shëndetin.
Certifikimi vjen pas një sërë testimesh të kryera nga Instituti i Shëndetit Publik, përmes Qendrës për Shëndet Publik në Tetovë. Sipas të dhënave laboratorike, uji që qarkullon në rrjetin e qytetit përmbush të gjitha kërkesat cilësore dhe është plotësisht i përdorshëm për konsum njerëzor.
Analizat e detajuara treguan se si treguesit mikrobiologjikë ashtu edhe ata fiziko-kimikë qëndrojnë brenda kufijve të përcaktuar nga normativat për ujin e pijshëm. NPK “Sharri” theksoi se është e përkushtuar të vijojë mbikëqyrjen e pandërprerë të cilësisë, duke garantuar një furnizim të qëndrueshëm dhe të sigurt për të gjithë qytetarët.
Në fund të komunikimit, kompania shprehu mirënjohjen për mirëkuptimin dhe besimin e treguar nga ana e konsumatorëve.
