Budapest, 4 gusht, Zhurnal.mk – Centrali bërthamor i Paksit, i vetmi në Hungari, i shpëtoi për pak një ndalese të plotë të funksionimit pasi niveli i ujit në lumin Danub ra në nivele rekord si pasojë e valës së të nxehtit.
Kryeministri hungarez, Peter Magyar, bëri të ditur se rreth orës 01:30 centrali ishte vetëm disa milimetra larg mbylljes totale, por më pas rënia e nivelit të ujit u ndal dhe deri në mëngjes lumi ishte rritur me 1,5 centimetra.
”Aktualisht centrali funksionon vetëm me turbinën e fundit, në kushte të sigurta, duke prodhuar rreth 240 megavat, ose vetëm 12% të kapacitetit të tij normal”, sipas Autoritetit Hungarez të Energjisë Atomike.
Kompleksi i Paksit, i vendosur rreth 100 kilometra në jug të Budapestit, furnizon zakonisht rreth një të tretën e konsumit të energjisë elektrike në vend dhe përdor ujin e Danubit për ftohjen e katër reaktorëve të tij.
Fundjavën e kaluar ekzistonte rreziku real që centrali të ndalej plotësisht për herë të parë që nga vënia në punë e reaktorit të parë në vitin 1982.
Megjithëse niveli i Danubit është rritur lehtë ditët e fundit, prodhimi i kufizuar i energjisë ka krijuar boshllëqe të konsiderueshme në furnizim.
Deri tani nuk janë raportuar ndërprerje të energjisë apo kufizime të detyruara, ndërsa qeveria u ka bërë thirrje qytetarëve dhe bizneseve të kursejnë energjinë elektrike, sidomos gjatë orëve të pikut në mbrëmje.
Sipas kryeministrit Magyar, konsumi i energjisë është ulur me më shumë se 500 megavat krahasuar me një ditë të zakonshme vere.
