Presidenti i Ukrainës, Volodymyr Zelensky, ka paralajmëruar se vendi i tij mund të përballet me mungesë raketash për luftën kundër Rusisë, si pasojë e konfliktit në Lindjen e Mesme, sipas BBC.
Në një intervistë, Zelensky tha se presidenti rus Vladimir Putin dëshiron një “luftë të gjatë” mes SHBA-së, Izraelit dhe Iranit, pasi kjo do ta dobësonte Ukrainën, duke devijuar burimet amerikane drejt rajonit tjetër.
Ai gjithashtu deklaroi se presidenti amerikan Donald Trump nuk është “në asnjë anë” në luftën mes Ukrainës dhe Rusisë dhe po përpiqet të mos irritojë Putinin.
Zelensky i bëri thirrje Trump dhe kryeministrit britanik Keir Starmer që të takohen dhe të gjejnë një qëndrim të përbashkët, pas kritikave të përsëritura të presidentit amerikan ndaj liderit britanik.
Konflikti në Lindjen e Mesme, tashmë në javën e tretë, është përhapur në rajonin e Gjirit, ku Irani ka goditur shtetet fqinje si kundërpërgjigje ndaj sulmeve të SHBA-së dhe Izraelit.
Zelensky u shpreh se ka një “ndjesi shumë të keqe” për ndikimin e këtij konflikti në luftën në Ukrainë, duke theksuar se negociatat për paqe po shtyhen vazhdimisht dhe se ka një arsye, lufta me Iranin.
Ai theksoi se situata po i shërben Putinit edhe për shkak të rritjes së çmimeve të energjisë, që dëmton Ukrainën, si dhe për shkak të mundësisë së një mungese raketash.
“Për Putinin, një luftë e gjatë në Iran është një plus”, tha Zelensky.
“Përveç çmimeve të energjisë, kjo do të thotë shterim i rezervave amerikane dhe i kapaciteteve të prodhimit të mbrojtjes ajrore. Pra, ne (Ukraina) përballemi me mungesë burimesh”, shtoi ai.
Zelensky paralajmëroi se do të ketë patjetër mungesë të raketave “Patriot”, gjë që do të përbëjë një sfidë serioze, duke shtuar se pyetja tani është se “kur do të shterojnë të gjitha rezervat në Lindjen e Mesme”.
“Amerika prodhon 60-65 raketa në muaj. Kjo do të thotë rreth 700-800 raketa në vit,” tha ai.
“Dhe vetëm në ditën e parë të luftës në Lindjen e Mesme u përdorën 803 raketa”, përfundoi Zelensky.
