Shkup, 1 maj, Zhurnal.mk – 1 Maji, i njohur si Dita Ndërkombëtare e Punës, shënon një nga datat më të rëndësishme për punëtorët në mbarë botën, duke rikujtuar luftën historike për të drejta, liri dhe kushte më të mira pune e jetese.
Kjo ditë e ka origjinën në lëvizjet punëtore të shekullit XIX, kur punëtorët kërkuan orar më të drejtë pune, paga më të larta dhe mbrojtje sociale. Me kalimin e viteve, 1 Maji është shndërruar në simbol të solidaritetit dhe bashkimit të punëtorëve në mbrojtje të të drejtave të tyre.
Edhe këtë vit, në shumë vende të botës, përfshirë Maqedoninë e Veriut, kjo ditë shënohet me protesta, tubime dhe aktivitete sindikale, ku kërkesat kryesore mbeten rritja e pagave, përmirësimi i kushteve të punës dhe respektimi i të drejtave të punëtorëve.
Lidhja e Sindikatave të Maqedonisë (LSM) sot proteston, për rritje të pagave, përmirësim të kushteve të punës dhe respektim më të madh të të drejtave të punëtorëve. Protesta pritet të mbledhë punëtorë nga sektorë të ndryshëm, të cilët do të shprehin pakënaqësitë e tyre ndaj standardit jetësor dhe politikave ekonomike, shkruan Zhurnal.mk.
