Romë, 2 prill – Zhurnal.mk – Naftëmbajtësja ”Rong Lin Wan”, një gjigant detar me gjatësi 250 metra, ndodhet këto ditë në Afrikën Perëndimore.
Kur të mbërrijë në portin e Roterdamit në Holandë, në pasditen e vonë të 9 prillit, do të jetë anija e fundit e mbushur me karburant aviacioni (kerosen) që ka dalë nga Gjiri, me destinacion Evropën, sipas “Corriere della Sera”.
Ajo u nis më 26 shkurt nga Mina Al Ahmadi (Kuvajt), me destinacion fillestar Maltën, sipas ”Marine Traffic”, dhe arriti të kalojë ngushticën e Hormuzit pikërisht në kohë, përpara bllokadës nga Irani.
Pas saj, nga Lindja e Mesme nuk do të vijë më asnjë pikë karburanti për avionët për kompanitë ajrore evropiane.
Naftëmbajtësja, që mban flamurin e Singaporit, shpjegon pse brenda linjave ajrore të kontinentit ka shqetësim.
“Sipas parashikimeve tona, nga fundi i prillit, fillimi i majit, do të kemi vetëm gjysmën e sasisë së kerosenit në dispozicion në Europë”, shpjegon drejtuesi i operacioneve të një prej kompanive më të mëdha ajrore.
“Ndoshta mund të fitojmë 3-5 javë duke përdorur një pjesë të rezervave strategjike dhe duke shtyrë operacionet e mirëmbajtjes së rafinerive, që zakonisht bëhen në pranverë. Por kjo nuk do të mjaftojë”, shton ai.
Një nga pasojat më të rëndësishme të luftës mes SHBA/Izraelit dhe Iranit prek pikërisht transportin ajror.
Evropa nuk importon sasi të mëdha nafte bruto nga Gjiri, por rreth gjysma e karburantit për avionë që përdoret në aeroportet evropiane vjen nga rafineritë që ndodhen në Ngushticën e Hormuzit, sipas analizave mbi dokumente zyrtare.
Një tjetër burim i rëndësishëm është India, por me krizën që po godet më fort Azinë Juglindore, tani anijet cisternë po devijohen drejt Lindjes, ku kompanitë kanë marzhe më të larta fitimi.
