Shkup, 3 prill, Zhurnal.mk – Kryetari i Partisë Demokratike Sali Berisha deklaroi sot se mazhoranca ka 8 muaj që i ka mohuar opozitës të drejtën themelore kushtetuese, komisionet hetimore.
Gjatë një konference për shtyp, Berisha iu referua kërkesës më të fundit të dorëzuar nga opozita për ngritjen e komisionit hetimor për ligjshmërinë e AKSHI-t, ndërsa shprehu bindjen se “Edi Rama do të bëjë gjithçka që të mos e lejojë”.
Ndërkohë sipas tij, protestat janë mjeti kryesor që i ka mbetur opozitës për të reaguar.
“Prej 8 muajsh nuk ka asnjë komision hetimor. Ndaj dhe ne u jemi drejtuar shqiptarëve. Ndaj dhe protesta e 17 prillit është kryengritja paqësore më e rëndësishme e qytetarëve shqiptarë. Parlamentin e kanë asgjësuar me të gjitha mjetet dhe ne kemi vetëm protestën si mjetin më kryesor”, u shpreh Berisha.
Kreu i PD-së deklaroi po ashtu se opozita e mbështet procesin e integrimit, ndonëse Shqipëria përveç kriterit gjeostrategjik, nuk plotëson asnjë kriter tjetër.
“Ky ka qenë qëndrimi ynë, por në qoftë se ne marrim përsipër të mashtrojmë në zbatimin e kritereve, standardeve, kërkesave, atë nuk e bëjmë kurrë. Ne kemi thënë të vërtetat, dhe të vërtetat tona po provohen, po faktohen. Dhe do i themi vazhdimisht. Kurrë nuk mund të mashtrojmë ne komunitetin ndërkombëtar”, u shpreh Berisha.
Berisha theksoi se PD kërkon një proces të bazuar në meritë, sepse beson se kriteret janë absolutisht të realizueshme.
Berisha foli po ashtu edhe për përjashtimet në anëtarësinë e PD-së, ndërsa theksoi se “çdo i përjashtuar ka të drejtën e ankimit”.
Por, sipas tij, “kushdo që ka punuar me kundërshtarin, nuk ka vend në PD”.
