Tiranë, 8 prill Zhurnal.mk – Komisioni për Çështjet Ligjore dhe Administratën Publike miratoi sot marrëveshjen e financimit me Cassa Depositi e Prestiti S.p.A., për përmirësimin e rrjetit të transmetimit të energjisë elektrike në veri të vendit pas tërmetit të vitit 2019.
Zëvendësministrja e Infrastrukturës dhe Energjisë, Edona Bilali, bëri të ditur se projekti parashikon ndërhyrje të rëndësishme për modernizimin e sistemit të shpërndarjes, duke rritur cilësinë e furnizimit me energji, sigurinë teknike të rrjetit dhe uljen e frekuencës dhe kohëzgjatjes së ndërprerjeve, si dhe humbjeve teknike.
Bilali theksoi se marrëveshja parashikon një kredi të butë në vlerë 35 milionë euro, e cila do të shkojë për ndërtimin dhe rindërtimin e nënstacioneve kryesore në Shëngjin, Shkodër dhe Fushë-Krujë, përmirësimin e linjave të shpërndarjes të tensionit të mesëm dhe të ulët si dhe instalimin e sistemeve të telekontrollit për kabinat elektrike në qarkun Shkodër.
Projekti do të zbatohet në dy faza, atë përgatitore, e cila përfshin studimet e fizibilitetit dhe planifikimin e investimeve dhe fazën e zbatimit të projekteve, ku do të kryhen punimet dhe mbikëqyret realizimi i tyre në terren.
Faza përgatitore parashikohet të përfundojë në dhjetor 2027, ndërsa zbatimi i punimeve do të zgjasë deri në dhjetor 2033.
“Qëllimi i programit është rritja e qëndrueshmërisë së furnizimit me energji në zona me zhvillim urban, si Shëngjin dhe Fushë-Krujë, përmirësimi i treguesve të performancës SAIDI që ka të bëjë me frekuencën e ndërprerjes së energjisë gjatë një viti dhe SAIFI që ka të bëjë me kohëzgjatjen e ndërprerjes së energjisë gjatë një viti, rehabilitimi i infrastrukturës ekzistuese dhe ndërtimi i linjave të reja të shpërndarjes, në përputhje me standardet evropiane”, deklaroi Bilali.
Projekti synon gjithashtu të mbështesë zhvillimin e sektorit privat dhe të rrisë interkonektivitetin, duke kontribuar në integrimin e Shqipërisë në Bashkimin Europian dhe në përmirësimin e klimës së biznesit dhe kushteve të jetesës në qarqet Durrës, Lezhë dhe Shkodër.
