Shkup, 16 Prill, Zhurnal.mk – Inspektorët e Agjencisë së Ushqimit kanë shqiptuar gjoba në vlerë prej mbi 19.000 euro ndaj tregtarëve të pandërgjegjshëm, në kuadër të kontrolleve të intensifikuara për parandalimin e qarkullimit të ushqimit të pasigurt në treg.
Sipas të dhënave zyrtare, janë realizuar gjithsej 1.221 kontrolle, gjatë të cilave janë asgjësuar 272 kilogramë ushqim i pasigurt, kryesisht produkte me origjinë shtazore. Po ashtu, janë asgjësuar edhe deri në 40 tonë vezë me origjinë nga Serbia.
Kontrollet kanë evidentuar një sërë parregullsish serioze, përfshirë shitjen e produkteve me afat të skaduar, përdorimin e mishit të ngrirë për përgatitjen e produkteve të freskëta, si dhe deklarime të pasakta të produkteve ushqimore.
Nga inspektimet është konstatuar gjithashtu se shtatë subjekte kanë operuar pa qenë të regjistruara si operatorë ushqimorë në Agjencinë e Ushqimit.
Shkelje janë gjetur edhe në aspektin e sigurisë dhe trajnimit të stafit: në tre operatorë është vërtetuar se punonjësit nuk kanë kryer kontrollet e detyrueshme shëndetësore dhe nuk kanë ndjekur trajnimet e nevojshme për trajtimin e ushqimit.
Ndërkohë, në 13 objekte janë evidentuar kushte të papërshtatshme higjienike dhe teknike.
