Bruksel, 21 Maj, Zhurnal.mk– Përfaqësuesit e qeverive të 27 vendeve anëtare të BE-së u pajtuan sot për një vlerësim të përbashkët pozitiv të reformave të deritanishme të Shqipërisë mbi grupin 1 të kaoitujve negociues të njohur me emrin ‘Themeloret’ që lidhet me sektorin e gjyqësorit dhe sundimit të ligjit, pasi vendi i hapi të 33 kapitujt negociues, por megjithatë ende nuk është caktuar një datë për mbylljen e këtij grupi prej 5 kapitujsh, raporton dtt-net.com, përcjellë Zhurnal.mk.
Pas ndasive fillestare midis qeverive, kur tre shtete hezitonin, e dy prej tyre ishin Estonia dhe Rumania, sot në të ashtuquajturin grup COELA, të gjithë përfaqësuesit i dhanë dritën e gjëlbër për raportin IBAR (Raporti i Vlerësimit të Përkohshëm të Standardeve) mbi gjendjen e reformave në pesë kapitujt negociues të grupit, sipas burimeve në Bruksel.
Burime të BE-së i thanë dtt-net.com se Ambasadorët ende në takimin e tyre të së premtës kanë për të vendosur të thërrasin një Konferencë Ndërqeveritare (IGC) midis Shqipërisë dhe BE-së, për të martën më 26 maj, por asnjë kapitull negociues nuk do të mbyllet në takimin e IGC-së të javës së ardhshme.
“IGC nuk do ta mbyllë Grupin 1, por do të konfirmojë përmbushjen e standardeve të ndërmjetme nga Shqipëria dhe do të vendosë standardet e mbylljes për këtë Grupim…”, thanë burime për dtt-net.com, duke shpjeguar se “dosja do t’u kalojë Ambasadorëve të BE-së (COREPER) nesër pasdite”, të cilët duhet të vendosin për IGC-në “me shumë mundësi për të martën e ardhshme”.
Grupi 1 përbëhet nga Kapitulli 5 (Prokurimi Publik); Kapitulli 18 (Statistikat); Kapitulli 23 (Gjyqësori dhe të drejtat themelore); Kapitulli 24 (Drejtësia, liria dhe siguria) dhe Kapitulli 32 (Kontrolli Financiar).
Shqipëria ka hapur të gjithë kapitujt negociues që nga të parët në tetor 2024, dhe qeveria e saj shpreson për anëtarësim në BE deri në vitin 2030. /
Nga vendet e Ballkanit Perëndimor, në procesin e anëtarësimit në BE Shqipëria ndodhet pas Malit të Zi, i cili ka hapur të gjithë kapitujt, dhe ka mbyllur 14 prej tyre deri më tash. /// Zhurnal.mk
