Prishtinë, 28 maj Zhurnal.mk – Kandidatja për deputete nga radhët e Partisë Demokratike të Kosovës, Blerta Deliu-Kodra, ka deklaruar se ky subjekt politik po hyn në zgjedhjet e 7 qershorit me një platformë që, sipas saj, synon t’i japë fund krizave dhe ta largojë nga pushteti Lëvizjen Vetëvendosje.
Në “Intervista Zgjedhore” në kp, ajo tha se programi i PDK-së është ndërtuar mbi nevojat reale të qytetarëve dhe parasheh rritje pagash, lehtësira fiskale dhe rikthim të zhvillimit ekonomik.
Ky është plani i PDK-së “për ta hequr Kurtin nga pushteti”
“Partia Demokratike e Kosovës do të jetë në këto zgjedhje në garë me një platformë të jashtëzakonshme zgjedhore, e cila bazohet drejtpërdrejt në nevojat që i kanë sot njerëzit…08:28 PDK do ta bazojë programin e saj në çështjen e rritjes së pagave. Do të kemi 50% rritje të pagave për të gjitha kategoritë shoqërore, përfshirë pensionistët dhe kategoritë e dala nga lufta në mënyrë që ata të arrijnë të përballojnë gjendjen e rëndë të rritjes së çmimeve. Së dyti, kemi propozuar lehtësira nga TVSH dhe heqjen e akcizës në mënyrë që të kemi një ballafaqim më të lehtë me shportën familjare…11:00 Kauza kryesore është t’i japim fund krizës. Këto vite janë karakterizuar nga kriza të njëpasnjëshme të prodhuara nga pushteti i Albin Kurtit. Kemi pasur mungesë të projekteve kapitale, buxheti ka rënë nën 20%. Kemi parë afera korruptive me rezervat shtetërore, kontrata njëburimore, tenderë me miliona euro, ndërkohë që qeveria flet për qytetarin por nuk ka zhvillim as për rrugën e Pejës, as për Mitrovicën, as për Gjakovën”, tha ajo.
Në ditën hapëse të fushatës zgjedhore për votimet e 7 qershorit, Deliu-Kodra theksoi se PDK-ja synon formimin e qeverisë së re bashkë me partitë e ish-opozitës, konkretisht LDK-në dhe AAK-në, derisa u shpreh optimiste se në këtë formë do të gjendet dhe zgjidhja për presidentin.
“PDK synon qeverinë me LDK-në dhe AAK-në”
“Partia Demokratike e Kosovës pret të ketë rritje në këto zgjedhje. Ne jemi në terren dhe shohim nevojën e njerëzve që të përqafojnë një program që bazohet në nevojat reale që i kanë njerëzit. Qytetarët janë të lodhur prej propagandës dhe polarizimit…Ne synojmë që të rritemi dhe jemi në garë që të krijojmë qeverinë e re bashkë me partitë e ish-opozitës, duke qartësuar pozicionin ku synojmë t’i japim Kosovës një drejtim të ri…39:22 Ne presim që do të kemi rritje në numra ish-opozita dhe rritja në numra do t’ia pamundësojë pushtetin Albin Kurti. Ne presim që me rezultatet e sotme të ketë rënie në numra. Ne nuk kemi qenë bllokues për presidentin”, shtoi ajo.
Deliu-Kodra foli edhe për mungesën e ish-krerëve të PDK-së, Hashim Thaçi dhe Kadri Veseli që po gjykohen nga Specialja në Hagë, duke thënë se prania e tyre do të ndikonte pozitivisht në rezultatin zgjedhor të partisë.
Deliu-Kodra: Po të ishin Thaçi e Veseli do të kishim rezultat të mirë në zgjedhje
“Jam e bindur se sikur të ishte Hashim Thaçi, Kadri Veseli dhe të tjerët në Kosovë rezultati ynë zgjedhor do të ishte ndryshe. Ne nderojmë kudo, madhështinë e burrave që i kanë dhënë Kosovës në të gjitha fazat e zhvillimit të saj. Fillimisht në organizimin e protestave të para ku kanë qenë të dënuar në mungesë. Kanë qenë pjesë e shtet-ndërtimit, në luftën e UÇK-së, ku në moshë të re kanë kapur pushkën për t’i dalë zot vendit. Kanë dhënë provimin për shtetin e Kosovës edhe në Rambuje dhe Vjenë e shpalljen e pavarësisë së Kosovës, fuqizimin e shtetit me autostrada dhe shkolla”, deklaroi kandidatja për deputete e PDK-së.
Ajo komentoi edhe mbështetjen që Fatmir Limaj i Nisma-s i dha PDK-së, pavarësisht se nuk u përfshi në listë për zgjedhjet e 7 qershorit.
Sipas saj, Limaj po kthehet në shtëpinë e vet politike, derisa u shpreh e hapur pro mundësisë që ai të përfshihet në struktura, e të marrë pjesë në zgjedhjet e brendshme të PDK-së.
A do të jetë Fatmir Limaj kryetar i ri i PDK-së?
“Bashkimi ynë edhe me Nisma-n dhe me plot të rinj dhe të reja, qytetarë të Kosovës që sot gjithandej përfaqësojnë vlerat e një partie që nuk do ta lërë Kosovën në status-quo dhe do të orientojnë të ardhmen më të mirë të shtetit…Ai e ka vendin te PDK. Zotëri Limaj po kthehet në shtëpinë ku ka qenë. Unë kur kam qenë deputete në vitin 2010 kam gjetur Hashim Thaçin, zotërin Limaj e plot të tjerë në PDK. Ai kthehet në shtëpinë e vet, njerëzit, aktivistët dhe motrat dhe vëllezërit e tij. Këto janë çështje të cilat nuk diskutohen sot kur po flasim për nevojën e rikthimit të pushtetit të PDK-së. E mira që është se sot ka një përbashkim kudo dhe unë isha në Malishevë dhe struktura atje dhe kryetari i degës dhe kandidatët që janë në garë sot kanë filluar bashkërendimin dhe rikthimin e Nisma-s”, theksoi Deliu-Kodra.
Në anën tjetër, Deliu-Kodra foli edhe për fotografinë e kryetarit të komunës së Drenasit, Ramiz Lladrovcit që vjen nga PDK-ja, me Martin Berishajn, ambasadorin e Kosovës në Kroaci, të cilin kjo parti jo pak herë e ka akuzuar për mafinë energjetike.
Ajo tha se ky veprim i Lladrovcit nuk e zbeh përgjegjësinë që, sipas saj, mban Berishaj për dëmet financiare që i janë shkaktuar Kosovës si pasojë e veprimeve të tij të mëhershme për sa i përket energjisë.
Çfarë kritike i bën PDK-ja Ramiz Lladrovcit për foton me Martin Berishajn
“Mendoj se zotëri Lladrovci e ka sqaruar në fotografinë e tij se për çka bëhej fjalë. Fjala ishte për raportet e mëhershme të Martin Berishajt me zotërin Lladrovci, po flas për një periudhë të mëhershme me Fehmi Lladrovci. Megjithatë, as fotografia e cila është postuar dhe asnjë fotografi me ndonjë zyrtar të PDK-së që nuk lidhet me zhvillimet e fundit nuk e largon nga pesha dhe barra e rëndë e përgjegjësisë penale që zotëri Martin Berishaj ia ka bërë dëmin miliona euro që i ka bërë Kosovës”, përfundoi Deliu-Kodra.
