Tivat, 5 qershor, Zhurnal.mk – Kancelari i Gjermanisë deklaroi sot në qytetin malazez të Tivatit se Serbia duhet të përcaktohet qartë mes Bashkimit Evropian ose Rusisë dhe Kinës, pasi politika aktuale e presidentit serb, Aleksandar Vuçiq, për të ruajtur ekuilibrin ndërmjet dy kampeve “nuk është e mundur”.
Friedrich Merz tha se ai dhe liderë të tjerë të vendeve të BE-së, si dhe përfaqësues të institucioneve evropiane, në samitin e mbajtur sot në qytetin bregdetar të Tivatit, u takuan me Vuçiqin dhe diskutuan këtë çështje. Nën udhëheqjen e Vuçiqit, Serbia vazhdon të ndërtojë lidhje të forta me Rusinë dhe Kinën, ndërkohë që synon edhe anëtarësimin në bllokun evropian, pavarësisht kritikave të vazhdueshme prej vitesh nga liderët evropianë për këtë politikë të dyanshme, shkruan dtt-net.com.
“U takova me të këtë mëngjes, së bashku me presidentin Emmanuel Macron dhe dy përfaqësuesit e BE-së, presidentin e Këshillit Evropian Antonio Costa dhe presidenten e Komisionit Evropian Ursula von der Leyen. Ne i thamë shumë qartë se çfarë presim prej tij, por gjithashtu i bëmë një ofertë të qartë se Serbia e ka të hapur rrugën drejt Bashkimit Evropian. Megjithatë, Serbia duhet të vendosë se ku qëndron. Një balancim mes Rusisë, Kinës dhe Evropës nuk është i mundur. Serbia duhet të vendosë qartë se ku e sheh të ardhmen e saj”, deklaroi Merz para gazetarëve.
“Nëse përgjigjja e Serbisë është: Evropa, atëherë përgjigjja e Evropës është: Serbia”, shtoi ai.
Përveç forcimit të marrëdhënieve politike dhe ekonomike me Rusinë dhe Kinën, Serbia po rrit me shpejtësi edhe kapacitetet e saj ushtarake përmes blerjes së armëve konvencionale dhe moderne nga të dyja këto vende. Ky veprim gjithashtu është kritikuar nga liderët e BE-së dhe shtetet anëtare të saj.
Në të njëjtën kohë, Vuçiq vazhdon të refuzojë t’u bashkohet sanksioneve të Bashkimit Evropian kundër Rusisë për agresionin ushtarak ndaj Ukrainës, pavarësisht thirrjeve të vazhdueshme prej më shumë se katër vitesh që nga fillimi i luftës.
Refuzimi për t’iu bashkuar sanksioneve kundër Rusisë është një nga arsyet kryesore pse Bashkimi Evropian ka ngadalësuar procesin e anëtarësimit të Serbisë që nga fundi i vitit 2021, duke mos hapur dhe as mbyllur asnjë kapitull negociues për gati pesë vjet. Përveç kësaj, Brukseli vazhdon të shprehë shqetësime për regresin demokratik në Serbi dhe mungesën e progresit në normalizimin e marrëdhënieve me Kosovën.
