Shkup, 6 qershor Zhurnal.mk – Mbi 14.500 nxënës të shkollave të mesme sot po i nënshtrohen provimit zgjedhor ekstern të maturës shtetërore, me fillim nga ora 09:00. Kandidatët për maturën shtetërore zgjedhin mes gjuhës së huaj dhe matematikës, ata për maturën profesionale mes anglishtes dhe matematikës, ndërsa kandidatët për maturën artistike mes anglishtes dhe historisë. Këtë vit, provimi i maturës organizohet nga Qendra Shtetërore e Provimeve (DIC) në tre formate të ndryshme, për herë të parë pas ndryshimeve në Ligjin për Arsimin e Mesëm.
Anglishtja me numrin më të madh të kandidatëve
Nga gjithsej 14.587 kandidatë të paraqitur, 13.208 kanë zgjedhur testin e gjuhës angleze, prej të cilëve 11.017 për maturën shtetërore, 2.107 për maturën profesionale dhe 84 për maturën artistike. Për matematikë janë paraqitur 1.173 kandidatë, ndërsa për histori vetëm 38, të gjithë për maturën artistike.
Gjuhët e tjera të huaja janë opsion vetëm për kandidatët e maturës shtetërore: gjermanishten e kanë zgjedhur 52 kandidatë, frëngjishten 20, rusishten 7 dhe italishten 2.
Gjimnazistët, shkollat profesionale dhe artistike me drejtime të ndryshme
Nga numri i përgjithshëm i kandidatëve, 12.184 janë paraqitur për maturën shtetërore, 2.276 për maturën profesionale shtetërore dhe 127 për maturën artistike shtetërore. Nxënësit e gjimnazeve japin vetëm maturë shtetërore dhe numri i tyre është 5.713.
Nxënësit e shkollave profesionale dhe artistike mund të zgjedhin ndërmjet të tre llojeve të maturës. Nga 8.629 kandidatë të shkollave profesionale, 6.353 kanë zgjedhur maturën shtetërore, ndërsa 2.276 maturën profesionale. Nga 245 kandidatë të shkollave artistike, 118 japin maturë shtetërore dhe 127 maturë artistike.
Provimet e gjuhës amtare më 11 dhe 12 qershor
Provimi i detyrueshëm ekstern i gjuhës dhe letërsisë amtare do të zhvillohet më vonë: kandidatët e maturës shtetërore do të testohen më 11 qershor, ndërsa ata të maturës profesionale dhe artistike më 12 qershor, gjithashtu nga ora 09:00.
Gjuhën dhe letërsinë maqedonase do ta japin 9.810 nxënës, gjuhën shqipe 4.199, gjuhën turke 360 dhe gjuhën serbe 5 kandidatë.
Telefonat celularë të ndaluar, një pjesë e provimeve në fakultete
Për organizimin e provimeve do të angazhohen rreth 2.500 testues dhe 200 vëzhgues. Në ambientet e provimit është e ndaluar përdorimi i telefonave celularë dhe pajisjeve të tjera elektronike.
Drejtoresha e Qendrës Shtetërore të Provimeve, Danela Jovçevska-Mihajllovska, theksoi se këtë vit një numër më i madh shkollash kanë kërkuar ndihmë për sigurimin e hapësirave në fakultete, ndërsa pjesa tjetër e nxënësve do t’i zhvillojnë provimet në sallat sportive, hollet dhe amfiteatrot e shkollave të tyre.
