Shkup, 17 qershor, Zhurnal.mk – Qendrat e të dhënave janë një nga investimet kyçe dhe motorët në shumë shtete të botës së zhvilluar, sjellin vende të shumta pune dhe për to nevojiten shumë përgatitje dhe studime për ndërtim, njoftoi Ministria e Transportit në reagim ndaj LSDM-së opozitare.
“Në ndërtimin e një qendre të dhënash, mesatarisht angazhohen të paktën 300 punëtorë, ndërsa për funksionimin operativ të saj punësohen rreth 100 inxhinierë të kualifikuar”, thuhet në reagimin e Ministrisë.
Ky është pjesë e reagimit të Ministrisë së Transportit ndaj konferencës për shtyp të LSDM-së, në të cilën opozita kundërshton ndërtimin e qendrave të të dhënave.
Ministria thekson se qendrat e të dhënave janë pararojë në përdorimin e energjisë së gjelbër dhe e forcojnë tranzicionin drejt energjisë së rinovueshme.
Gjithashtu, Ministria nënvizon se gjatë ndërtimit të qendrave të tilla duhet të plotësohen të gjitha kushtet teknike dhe të hartohen të gjitha llojet e studimeve.
“Investimet në qendra të dhënash arrijnë miliarda euro në të gjitha shtetet e zhvilluara në Evropë dhe Amerikë, zhvillimi i teknologjisë dhe inteligjencës artificiale është një nga motorët kryesorë të shteteve moderne.”
