Lucknow, 22 qershor Zhurnal.mk – Të paktën 15 persona kanë humbur jetën pas një zjarri të madh që përfshiu një ndërtesë tregtare në qytetin Lucknow, në shtetin Uttar Pradesh të Indisë. Sipas autoriteteve, zjarri shpërtheu në orët e mëngjesit në një godinë ku në katet e poshtme ndodheshin një dyqan kafshësh shtëpiake dhe një klinikë veterinare, ndërsa në katet e sipërme funksiononin një qendër studentore dhe një studio animacioni.
Zëvendëskryeministri i Uttar Pradesh, Brajesh Pathak, konfirmoi se ekipet e shpëtimit kanë nxjerrë të paktën 15 viktima nga ndërtesa, ndërsa rreth 10 persona të tjerë janë shpëtuar dhe janë transportuar në spital për ndihmë mjekësore. Pamjet e publikuara në rrjetet sociale tregojnë momente paniku, me persona që përpiqeshin të shpëtonin duke dalë nga dritaret e thyera. Një prej tyre ra nga kati i sipërm gjatë tentativës për t’u larguar, por raportohet se ka mbijetuar dhe po merr trajtim në spital.
Zjarrfikësit u përballën me vështirësi të mëdha për shkak të tymit të dendur, duke u detyruar të hapnin një mur të pasmë për të hyrë në ndërtesë dhe për të vijuar operacionin e shpëtimit. Shkaqet e zjarrit mbeten ende të paqarta, ndërsa autoritetet kanë nisur hetimet për të zbardhur rrethanat e ngjarjes tragjike.
