Shkup, 23 korrik, Zhurnal.mk – Ministri i Drejtësisë, Jeton Shasivari, zhvilloi një takim me Koordinatoren e Përhershme të Kombeve të Bashkuara në Maqedoninë e Veriut, Rita Kolumbia, dhe përfaqësuesin e UNOPS-it, Marko Vujaçiq, ku u diskutuan prioritetet e reformës në drejtësi dhe projektet për përshpejtimin e transformimit digjital të sistemit gjyqësor.
Sipas ministrit, në fokus të bisedimeve ishte avancimi i sistemit AKMIS, vendosja e dorëzimit elektronik në procedurat gjyqësore, përmirësimi i incizimit audio dhe video të seancave, rritja e ndërveprueshmërisë institucionale, si dhe forcimi i sigurisë kibernetike.
Shasivari theksoi se digjitalizimi është një hap kyç drejt një sistemi gjyqësor më efikas, më transparent dhe më të qasshëm për qytetarët.
Ai vlerësoi se Kombet e Bashkuara dhe UNOPS mbeten partnerë të rëndësishëm të Ministrisë së Drejtësisë në zbatimin e reformave dhe përafrimin e sistemit të drejtësisë me standardet evropiane dhe ndërkombëtare.
