Shkup, 27 korrik, Zhurnal.mk – SDSM duhet të kërkojë përgjegjësi nga kuadrot e veta të emëruara në Gostivar, e jo të shpërndajë dezinformata, reagoi VMRO‑DPMNE ndaj akuzave të opozitës se institucionet kanë heshtur ndërkohë që mijëra qytetarë kanë përfunduar në spital me simptoma helmimi.
Nga partia në pushtet theksojnë se SDSM, në paraqitjet e veta ditore politike, plasojnë informacione të pasakta dhe të paprecize, përdorin raporte të vjetruara dhe përpiqen të krijojnë ndjenjë pasigurie dhe paniku te qytetarët, edhe pse – siç thonë – situata është stabilizuar në kohë rekord.
“Kjo nuk është hera e parë që SDSM demantohet me fakte zyrtare. Megjithatë, vazhdon me shpërndarjen e gënjeshtrave dhe dezinformatave, me qëllim që të krijojë shqetësim të pabazë te publiku. SDSM përpiqet të përfitojë politikisht nga skandali me ujin, të cilin e krijuan kuadrot e koalicionit të tyre me BDI dhe Taravarin. Në vend që të merren me spinimin e informacionit dhe shpërndarjen e panikut, duhet të kërkojnë përgjegjësi nga Valbon Limani. Në koalicion me BDI dhe Taravarin, ata mbrojnë një kryetar komune nga radhët e tyre, i cili nuk ka asnjë kompas moral dhe nuk e sheh veten si fajtor për situatën në Gostivar”, thonë nga VMRO‑DPMNE.
Opozita informoi sot se dje janë regjistruar edhe 125 kontrolle të qytetarëve me simptoma helmimi, ndërsa një fëmijë është hospitalizuar. Sipas tyre, numri i të prekurve ka kaluar mbi 4.000 qytetarë, ndërkohë që uji ka qenë i ndotur me fekale dhe institucionet kanë heshtur.
“Mickoski thotë se nga sot uji teknik në Gostivar është i pastër. A i besoni? Simptomat kanë filluar më 14 korrik, ndërsa epidemia është shpallur më 19 korrik. Plot pesë ditë institucionet nuk e kanë informuar publikun me kohë dhe nuk kanë ndërmarrë masa, ndërkohë që qytetarët masivisht kanë përfunduar në ambulanca dhe spitale”, thonë nga SDSM.
Nga Qeveria dje njoftuan se po ndërmerren masa për stabilizim të plotë të gjendjes në Gostivar dhe se ditëve në vijim pritet të vendoset furnizim i rregullt dhe i sigurt me ujë teknikisht të pastër.
