Tiranë, 30 korrik Zhurnal.mk – Ministri për Evropën dhe Punët e Jashtme i Shqipërisë, Ferit Hoxha, ka reaguar pas debatit të krijuar lidhur me mundësinë e hapjes së një konsullate serbe në Shqipëri, duke theksuar se prioriteti i Tiranës mbetet hapja e një Konsullate të Përgjithshme shqiptare në Luginën e Preshevës.
Sipas Hoxhës, Shqipëria ka kërkuar hapjen e një konsullate në Luginën e Preshevës, ndërsa Serbia ka paraqitur kërkesën për hapjen e një Konsullate të Përgjithshme në Shkodër. Ai theksoi se veprimet konkrete do të ndërmerren vetëm pasi të ketë dakordësi të plotë mes dy palëve për të gjitha aspektet e procesit.
Ministri nënvizoi se reciprociteti është një parim themelor i marrëdhënieve diplomatike dhe nuk nënkupton domosdoshmërisht barazi në objektiva apo interesa, por shërben si bazë për mirëkuptimin ndërmjet shteteve.
Hoxha theksoi se synimi i Shqipërisë është të krijojë një prani të përhershme konsullore në Luginën e Preshevës për të qenë më pranë komunitetit shqiptar, për t’u ofruar mbështetje më të drejtpërdrejtë dhe për të mbrojtur më mirë të drejtat dhe interesat e tyre legjitime.
Në reagimin e tij, ministri shprehu habinë që debati publik është përqendruar te interesat e supozuara të Serbisë, ndërsa, sipas tij, është lënë në hije përfitimi konkret që sjell për shqiptarët e Luginës hapja e një përfaqësie të përhershme konsullore shqiptare.
Ai përfundoi duke theksuar se politika e jashtme e Shqipërisë udhëhiqet nga interesi kombëtar, respektimi i së drejtës ndërkombëtare dhe vlerat evropiane, standarde që vendi synon t’i forcojë edhe më tej në rrugën drejt anëtarësimit në Bashkimin Evropian.
