Shkup, 3 gusht, Zhurnal.mk – Turistët maqedonas që këtë verë udhëtojnë drejt destinacioneve bregdetare greke duhet të kenë kujdes me rregullat specifike të komunikacionit në Greqinë fqinje, ku sanksione parashikohen jo vetëm për vozitje të shpejtë, por edhe për vozitje tepër të ngadaltë.
Sipas Ligjit grek për komunikacionin, ndalohet rreptësisht krijimi i pengesave në rrugë, ndërsa për drejtuesit që lëvizin me shpejtësi nën minimumin e përcaktuar parashihet gjobë prej 30 eurosh.
Në autostrada dhe rrugë ekspres është e përcaktuar qartë kufiri i poshtëm – automjetet nuk lejohen të lëvizin me shpejtësi më të ulët se 70 kilometra në orë.
Nëse automjeti, për shkak të defektit teknik ose karakteristikave të tij, nuk mund të arrijë shpejtësinë 70 km/h, drejtuesi ka detyrimin të përdorë rrugë alternative lokale, në mënyrë që të mos pengojë qarkullimin.
Shenja e shpejtësisë minimale në Greqi është me formë rrethore, me sfond blu dhe numër të bardhë që tregon shpejtësinë më të ulët të lejuar.
Sipas nenit 23 të Ligjit për komunikacionin, vozitja e ngadaltë nuk do të sanksionohet në tre situata të justifikuara:
• Gjendje e keqe e karrexhatës;
• Kushte të pafavorshme atmosferike (shi i fortë, mjegull e dendur ose borë);
• Trafik i rënduar ku ngadalësimi është i domosdoshëm për arsye sigurie.
Duke pasur parasysh frekuencën e shtuar të automjeteve gjatë sezonit veror, drejtuesve u rekomandohet respektimi i të gjitha rregullave lokale për të shmangur shpenzimet e padëshiruara nga gjobat.
