Shkup, 6 gusht, Zhurnal.mk – Kryetari i LSDM‑së, Venko Filipçe, sot qëndroi në Novo Sello pas incidentit të mbrëmshëm në të cilin u sulmuan të rinj që kishin treguar problemin me ujin e pijshëm. Ai kërkoi reagim të menjëhershëm nga policia dhe prokuroria, duke vlerësuar se pas sulmit qëndrojnë persona të afërt me pushtetin.
Filipçe theksoi se incidenti është rezultat i frikës brenda strukturës qeverisëse për shkak të daljes së së vërtetës në opinion.
“Jemi sot këtu në Novo Sello për shkak të incidentit që ndodhi mbrëmë. Incident që nuk duhej të ndodhte, por kur tashmë ka ndodhur, falë grupit të organizuar kriminal të Hristijan Mickoskit, nuk duhet dhe nuk guxon të kalojë në heshtje. U sulmuan fëmijë të rinj. Fëmijë të rinj që e thoshin të vërtetën. E vërteta është se uji në Gostivar dhe në gjysmën e shtetit është i ndotur dhe nuk është për pije”, deklaroi Filipçe.
Sipas liderit të LSDM‑së, pas presioneve mediatike ka pasuar edhe përplasje fizike me aktivistët e rinj.
“Dhe kur linçi mediatik i grupit të organizuar kriminal nuk ndihmon, ata u përplasën fizikisht me fëmijët. Me fëmijët e Novo Sellos, me fëmijët e Maqedonisë, të cilët e vetmja gjë që bënin ishte se thoshin të vërtetën. Kërkojmë hetim të menjëhershëm, reagim të menjëhershëm të Ministrisë së Punëve të Brendshme, hetim të menjëhershëm të prokurorisë – kush ishin ata njerëz? Sepse ishin aktivistë të VMRO‑së, sepse ishin njerëz të afërt me Hristijan Mickoskin. Ata njerëz që u përplasën fizikisht me fëmijët e rinj, të cilët, po e përsëris, thoshin të vërtetën”, shtoi ai.
Filipçe porositi se partia do të qëndrojë pas të rinjve dhe se duhet të ketë përgjegjësi për këtë ngjarje.
“Dërgoj mesazh: fëmijët nuk janë vetëm. Nuk ishin vetëm mbrëmë, nuk janë vetëm sot, nuk do të jenë vetëm as nesër. Ky është shenjë se pushteti është i frikësuar. Është i frikësuar sepse po del e vërteta për ujin e ndotur, po del e vërteta për ekonominë, po del e vërteta për Evropën, po del e vërteta se tani jemi zorrë qorre e Evropës. Po vjen koha e drejtësisë dhe e së vërtetës. Dhe do të përgjigjen. Do të përgjigjen për të gjitha krimet, e sidomos për atë që u përplasën me fëmijët, sepse e vetmja gjë që fëmijët bënin – po e them për herë të tretë – ishte se thoshin të vërtetën”, theksoi Filipçe.
Ai përfundoi se përpjekjet për të heshtur ata që mendojnë ndryshe nuk do të kenë sukses.
“Ky pushtet nuk do të na heshtë. Nëse ky është mesazhi se kushdo që mendon ndryshe dhe thotë të vërtetën do të heshtet dhe do të përballet fizikisht, dërgoj mesazh të qartë – nuk do t’ju funksionojë. Po vjen koha e së vërtetës dhe drejtësisë”, porositi kryetari i LSDM‑së.
