Bogota, 10 gusht Zhurnal.mk – Të paktën 27 persona kanë humbur jetën në tërmetin e fortë që goditi pjesën veri-perëndimore të Kolumbisë, raportojnë mediat botërore.
Tërmeti me magnitudë 7,4 ndodhi rreth 34 kilometra në veri-perëndim të qytetit Cartago, ndërsa epiqendra ishte në thellësi 115 kilometra.
Guvernatorja e rajonit perëndimor kolumbian Chocó, Nubia Carolina Córdoba-Curi, deklaroi se në kryeqytetin e atij rajoni, Quibdó, ka “dëme të konsiderueshme” në ndërtesa dhe disa të lënduar.
“Jemi të shqetësuar për pasgoditjet e mundshme. Edhe pse epiqendra ishte në San José del Palmar, në kryeqytet (Quibdó) ka të lënduar dhe dëme të konsiderueshme në ndërtesa. Tashmë po bëjmë vlerësimin e dëmeve”, shkroi Córdoba-Curi në X.
Nuk pritet që tërmeti të shkaktojë tsunami.
Sipas portalit lokal “Público”, në tërmet u dëmtuan katedralja dhe më shumë se 10 aeroporte. Në Cali dhe Manizales ranë fasada nga shumë ndërtesa, ndërsa në Manizales u dëmtua një nga kullat e katedrales.
Në qytetin kolumbian Quibdó, kryeqytet i departamentit Chocó, që ndodhet në bregun e Paqësorit, u shembën disa ndërtesa, ka të lënduar, por ende nuk dihet numri i saktë, deklaroi Nubia Carolina Córdoba, guvernatore e Chocó.
Një pjesë e çatisë së aeroportit ndërkombëtar “Matecaña” u shemb dhe ekipe po përpiqen të arrijnë te njerëzit e bllokuar nën rrënoja. Autoritetet ende nuk kanë raportuar të lënduar apo viktima në atë vendndodhje.
Tërmeti, sipas orës lokale, u ndje herët në mëngjes edhe në Venezuelë, Ekuador dhe Panama.
